REGİONLAR


Qənirə Paşayeva Tovuzda hərbçilərimizi Silahlı Qüvvələr Günü münasibətilə təbrik edib

Bakı, 26 iyun, AZƏRTAC

Milli Məclisin Mədəniyyət komitəsinin sədri Qənirə Paşayeva iyunun 26-da Tovuzda “N” saylı hərbi hissədə qulluq edən əsgər və zabitlərlə görüşərək onları Silahlı Qüvvələr Günü münasibətilə təbrik edib.

AZƏRTAC xəbər verir ki, Qənirə Paşayeva Milli Ordumuzun yaranma tarixindən, şanlı səhifələrdən söz açıb, 44 günlük Vətən müharibəsində tarixi Zəfərimizi dünya azərbaycanlılarının, bütün türk dünyasının qürur mənbəyi kimi dəyərləndirib. "Azərbaycan Ordusu əcdadımızın hərbi ənənələrini davam və inkişaf etdirərək, günümüzdə dünyanın güclü orduları sırasında özünəməxsus mövqeyə sahibdir. Prezident, Müzəffər Ali Baş Komandan İlham Əliyevin rəhbərliyi ilə şanlı Ordumuz 2020-ci ildə düşmənə qalib gələrək tarix yazdı. Fədakar əsgər və zabitlərimizin qəhrəmanlığı hesabına, şəhidlərimizin canı bahasına bütün dünya Azərbaycanın gücünü gördü, ədalət Zəfər çaldı. şanlı Ordumuzla qürur duyuruq!”, - deyə Milli Məclisin deputatı vurğulayıb.

Q.Paşayeva bildirib ki, Qərbin aparıcı mətbu orqanlarında, habelə ABŞ-ın “Milli Müharibə” Kollecinin və “Seton Hall” Universitetinin “Diplomatiya və Beynəlxalq Münasibətlər Məktəbi”nin analitik nəşrlərində Azərbaycan Ordusunun hərbi taktikası öyrənilir. Onlar belə qənaətə gəliblər ki, hətta dünyanın ən aparıcı ölkəsi belə torpaq uğrunda mübarizə aparan Azərbaycan Ordusunun qarşısında duruş gətirə bilməzdi. 44 günlük müharibədə tətbiq edilən döyüş taktikası dünya hərb tarixində yenilik hesab olunur və uyğun ali hərb məktəblərinin proqramlarına, dərsliklərinə salınır. ABŞ Hərbi Akademiyası və Pentaqonun rəsmiləri Azərbaycan Ordusunun hərbi əməliyyatlarının öyrənilməsinin vacibliyini vurğulayır.

Komitə sədri sonda şəhidlərimizə Tanrıdan rəhmət, yaralı qazilərimizə şəfalar diləyib, əsgərlərimizə Vətənin keşiyində ayıq-sayıq durmağı tövsiyə edib.

Tədbirin sonunda Tovuz rayonunun musiqi kollektivi hərbçilər qarşısında geniş konsert proqramı ilə çıxış ediblər.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.