REGİONLAR
Qərb bölgəsində Ulu Öndərin xatirəsi ehtiramla anılıb
Gəncə, 12 dekabr, Rauf Hacıyev, AZƏRTAC
Dekabrın 12-də respublikamızın qərb bölgəsində ümummilli lider Heydər Əliyevin xatirəsi anılıb.
AZƏRTAC xəbər verir ki, Gəncə şəhərində Heydər Əliyev adına meydanda təşkil olunan anım tədbirində Ulu Öndərin xatirəsi bir dəqiqəlik sükutla yad edilib.
Mərasimdə iştirak edən rəsmi şəxslər, idarə, təşkilat və müəssisələrin rəhbərləri, eləcə də şəhər sakinləri Heydər Əliyevin Gəncənin baş meydanındakı abidəsini ziyarət edib, önünə gül dəstələri qoyublar. Burada quraşdırılan böyük monitorda dünya şöhrətli siyasətçinin həyatından bəhs edən film nümayiş etdirilib.
X X X
Zaman keçdikcə və biz dünyada baş verən siyasi prosesləri dərk etdikcə Heydər Əliyevin xalqı və dövlətçiliyi üçün nə qədər cəsarətli addımlar atdığını, böyük zəhmət, məşəqqət və fədakarlıq hesabına müstəqil Azərbaycan dövlətini qurub yaratdığını bir daha özümüz üçün aydınlaşdırmış oluruq.
AZƏRTAC xəbər verir ki, bu fikirlər ümummilli lider Heydər Əliyevin anım günü münasibətilə Daşkəsən rayonunda təşkil olan tədbirdə səsləndirilib.
Dekabrın 12-də daşkəsənlilər Ulu Öndərin rayon mərkəzində ucalan abidəsi önünə gül-çiçək dəstələri düzüb, dahi rəhbərə sonsuz hörmət və ehtiramlarını nümayiş etdiriblər.
Tədbir iştirakçıları Heydər Əliyev Mərkəzində Ulu Öndərin həyat və fəaliyyətinin müxtəlif dövrlərinin əks olunduğu fotolara baxıblar.
Sonra rayon icra hakimiyyətində ictimaiyyət nümayəndələrinin iştirakı ilə yığıncaq keçirilib. Tədbirdə Heydər Əliyevin əziz xatirəsi bir dəqiqəlik sükutla yad edilib, Ulu Öndərin həyat və siyasi fəaliyyətindən bəhs edən filmə baxış olub.
Çıxış edənlər dahi rəhbərin həyat və fəaliyyətindən, onun xalqımız və dövlətimiz üçün gördüyü işlərdən söhbət açıblar.
X X X
Dekabrın 12-də ümummilli lider Heydər Əliyevin vəfatının 13-cü ildönümü ilə əlaqədar Naftalan şəhərində ümumşəhər tədbiri keçirilib.
AZƏRTAC xəbər verir ki, şəhər sakinləri əvvəlcə Ulu Öndərin abidəsini ziyarət edib, önünə gül-çiçək dəstələri düzüblər.
Heydər Əliyev Mərkəzində davam edən tədbirdə Ulu Öndərin əziz xatirəsi bir dəqiqəlik sükutla yad olunub.
Tədbirdə Heydər Əliyevin həyat və siyasi fəaliyyətindən danışılıb, onun Azərbaycan xalqının səadəti yolunda göstərdiyi fədakarlıqlar xatırlanıb.
X X X
Goranboy rayonunda ümummilli lider Heydər Əliyevin xatirəsi anılıb.
AZƏRTAC xəbər verir ki, Ulu Öndərin abidəsi önünə gülqoyma mərasimi ilə başlanan anım mərasimində rayonun rəhbər işçiləri, hüquq-mühafizə orqanlarının əməkdaşları, idarə, müəssisə, təşkilat kollektivləri və ictimaiyyət nümayəndələri iştirak ediblər.
Əvvəlcə Ulu Öndərin adını daşıyan mərkəzdə Heydər Əliyevin həyat və siyasi fəaliyyətini əks etdirən fotolarla tanışlıq olub, monitorda Ümummilli Liderin həyatından fraqmentlər nümayiş etdirilib.
Sonra tədbirdə Heydər Əliyevin Vətən və xalq qarşısındakı misilsiz xidmətlərindən danışılıb.
Tədbirin sonunda Heydər Əliyevin anım günü ilə bağlı ehsan süfrəsi açılıb, ruhuna dualar oxunub.
X X X
Ulu öndər Heydər Əliyevin xatirəsi Samux rayonunda da anılıb.
AZƏRTAC xəbər verir ki, rayonun icra strukturları, hüquq–mühafizə orqanlarının rəhbərliyi və rayon sakinləri müasir, müstəqil Azərbaycanın memarı və qurucusu Heydər Əliyevin adını daşıyan parkda Ulu Öndərin abidəsi önünə gül dəstələri düzərək, xatirəsini ehtiramla yad ediblər.
Tədbir iştirakçıları Heydər Əliyev Mərkəzində Ümummilli Liderin həyat və fəaliyyətinin müxtəlif anlarını əks etdirən fotolardan ibarət sərgi ilə tanış olublar.
Sonda Ulu Öndərə həsr olunan film nümayiş etdirilib.