Tovuz, 15 sentyabr, Famil Quliyev, AZƏRTAC 

Sentyabrın 15-də Tovuz rayonunun 84 ümumtəhsil məktəbində Bilik günü təntənə ilə qeyd olunub.

AZƏRTAC xəbər verir ki, yeni dərs ilinin başlanması münasibətilə Tovuz şəhər N.Tusi adına təbiət və texniki təmayüllü məktəb-liseydə keçirilən mərasimdə məktəbin direktoru Valeh Məmmədov, rayon icra hakimiyyətinin nümayəndəsi Bəhruzər Rüstəmov çıxış edərək, pedaqoji kollektivi və şagirdləri yeni dərs ilinin başlanması və Bilik günü münasibətilə təbrik ediblər.

Qeyd olunub ki, ötən dərs ilinin yekunlarına görə məktəb-liseyi bitirən məzunlardan 39 nəfər ali məktəblərə, 5 nəfər isə orta ixtisas məktəblərinə qəbul olunub. Onlardan 7-si qəbul imtahanlarında 500-dən, 2-si isə 600-dən çox bal toplayıb. Hazırda məktəb-liseydə 1502 şagird təhsil alır və onların təlim-tərbiyəsi ilə 136 müəllim məşğul olur. Yeni dərs ilində məktəb-liseyin birinci siniflərində 250 şagird təhsil alacaq.

Daha sonra gənc nəslin elmi biliklərə dərindən yiyələnməsi, onların hərtərəfli inkişafı üçün təhsil ocağında yaradılan şəraitdən bəhs olunub. Çıxış edənlər yeni dərs ilində müəllim və şagirdlərə uğurlar arzulayıblar.

X X X

Respublikanın hər yerində olduğu kimi, Qazax məktəblərində də 15 sentyabr - Bilik günü yüksək səviyyədə qeyd edilib.

AZƏRTAC xəbər verir ki, Qazax Rayon İcra Hakimiyyətinin başçısı Rəcəb Babaşov, Milli Məclisin deputatları Kamran Nəbizadə, Ülviyyə Ağayeva, sərbəst güləş üzrə Azərbaycan yığma komandasının baş məşqçisi Firdovsi Umudov məktəbliləri təbrik etmək üçün şəhər Mehdi Hüseyn adına məktəb-liseydə olublar.

Rayon icra hakimiyyətinin başçısı Rəcəb Babaşov tədbirdə çıxış edərək Bilik günü münasibətilə müəllim və şagirdləri, valideynləri təbrik edib, Prezident İlham Əliyevin rəhbərliyi ilə ölkəmizdə təhsil sahəsində qazanılan uğurlardan danışıb. Qeyd edib ki, respublikamızın bütün bölgələrində yeni məktəb binaları tikilir, müəllim və şagirdlərin təlim-tədris şəraiti daha da yaxşılaşdırılır. Yaradılmış bu yüksək şərait böyüməkdə olan gənc nəslin elmin sirlərinə daha dərindən yiyələnməsinə, gənc nəslin savadlı və bacarıqlı olmasına imkan yaradır. Bu gün ali məktəblərə qəbul zamanı istər şəhər, istərsə də kənd məktəblərindən olan məzunların yüksək bilik nümayiş etdirməsi bu diqqət və qayğının əyani şəkildə göstəricisidir.

Milli Məclisin deputatları Kamran Nəbizadə və Ülviyyə Ağayeva çıxış edərək yeni dərs ilinin başlanması münasibətilə müəllim və şagirdləri təbrik edərək, onlara uğurlar arzulayıblar.

X X X

Sentyabrın 15-də Şəmkir rayonunun Qaranüy və Hacalılar kəndlərində Təhsil Nazirliyinin maliyyə dəstəyi ilə tikilmiş modul tipli ümumi orta məktəblərin açılış mərasimi keçirilib.

Tədbirdə Şəmkir Rayon İcra Hakimiyyətinin başçısı Alimpaşa Məmmədov və aparatın məsul işçiləri, rayon təhsil şöbəsinin müdiri Məcid Şıxlınski, təhsil işçiləri və ictimaiyyət nümayəndələri iştirak ediblər.

AZƏRTAC xəbər verir ki, tədbirdə məktəb direktorları, qabaqcıl müəllimlər, kənd ağsaqqalları və valideynlər çıxış edərək, Prezident İlham Əliyevə diqqət və qayğıya görə təşəkkürlərini bildiriblər.

Rayon icra hakimiyyətinin başçısı Alimpaşa Məmmədov çıxışında Bilik günü və məktəblərin açılışı münasibətilə təhsil işçilərini və şagirdləri təbrik edib, onlara yeni dərs ilində müvəffəqiyyətlər arzulayıb. O, Prezident İlham Əliyevin, Birinci vitse-prezident Mehriban xanım Əliyevanın təhsilə və mədəniyyətin inkişafına böyük diqqət və qayğı göstərdiklərini, Şəmkir rayonunun da bu qayğıdan bəhrələnərək ilbəil öz nailiyyətlərini artırdığını vurğulayıb.

Qeyd edək ki, fəaliyyət başlayan hər iki məktəb modul tipli birnövbəli ümumi orta məktəblərdir. Qaranüy kənd ümumi orta məktəbində 96 şagird, Hacalılar kənd ümumi orta məktəbində isə 46 şagird təhsil alacaq.

X X X

Yeni dərs ilinin başlanması münasibətilə Ağstafa rayonunun ümumtəhsil məktəblərində də bir sıra tədbirlər reallaşıb.

AZƏRTAC xəbər verir ki, rayon rəhbərliyinin və hüquq-mühafizə orqanları nümayəndələrinin də iştirakı ilə keçirilən tədbirlərdə yeni dərs ilinin başlanması münasibətilə müəllim və şagird kollektivləri təbrik edilib, ölkəmizdə təhsilin inkişafına göstərilən dövlət qayğısından danışılıb.

Qeyd olunub ki, Prezident İlham Əliyevin və Birinci xanım Mehriban Əliyevanın göstərdikləri dəstək və qayğı ölkədə təhsili yeni inkişaf mərhələsinə qaldırıb. Respublikanın bütün bölgələrində olduğu kimi, Ağstafa rayonunda da təhsil sahəsində qazanılan uğurlar ildən-ilə artır. Təhsil sahəsində həyata keçirilən islahatlar və göstərilən qayğı cari tədris ilinin daha yüksək nəticələrlə başa vurulacağına əminlik yaradır.

Yeni dərs ilinin başlanması münasibətilə keçirilən tədbirlər məktəb kollektivlərinin Bilik gününə həsr etdikləri bədii-musiqili proqramlarla davam etdirilib.