Bakı, 7 iyun, AZƏRTAC

Qərbi Azərbaycan İcmasının yeni loqosu ictimaiyyətə təqdim edilib.

AZƏRTAC xəbər verir ki, loqonun təqdimat mərasimi ilə bağlı keçirilən mətbuat konfransında Qərbi Azərbaycan İcmasının sədri, Milli Məclisin deputatı Əziz Ələkbərli media nümayəndələrinə loqo barədə məlumat verib.

Bildirilib ki, loqonun tərtibatında İrəvan xanlığının bayrağında yer alan günəş və Azərbaycan dövlətinin rəmzlərindən biri olan səkkizguşəli ulduz bir-biri ilə sintez edilərək, Azərbaycan bayrağının rənglərində təcəssüm olunub. Üçbucaq şəkilində olan hər bir ikon öz evlərindən deportasiya olunmuş qərbi azərbaycanlıları təmsil etməkdədir. İkonların üçkünc olması rəmzi olaraq öz ata-baba yurdlarına qayıtmaq istəyi ilə yaşayan soydaşlarımızın evlərinə doğru olan istiqamətini ifadə etməkdədir. Üçbucaq ikonların dairə şəklində birləşməklə yaratdığı birlik Qərbi Azərbaycan İcmasını təmsil edir.

Mətbuat konfransında loqonun tərtibatçısı, Türkiyədə yaşayan tanınmış azərbaycanlı dizayner Adəm Yunisovun onlayn çıxışı dinlənilib. Adəm Yunisov məhz onun dizayn etdiyi loqonun seçilməsindən məmnunluğunu ifadə edərək İcmaya uğurlar diləyib.

Qeyd edək ki, Adəm Yunisov 1978-ci ildə Azərbaycanda doğulub. Ali təhsilini Ankarada Hacettepe Universitetinin kompüter mühəndisliyi bölümündə alıb. Türkiyədə “Element Visual Studio” adlı şirkəti yaradan dizayner öz layihələri, qazandıqları uğurlarla müxtəlif ölkələrdə tanınır.

Adəm Yunisov ilk dəfə öz vətənində Bakıda keçirilən birinci Avropa Oyunlarının loqosunun müəllifi kimi məşhurlaşıb. Türkiyə Cümhuriyyətinin 100 illiyinə həsr olunmuş loqotip də onun əl işidir.

O, həmçinin Türk Dövlətləri Təşkilatının ali ordeni olan “Türk Dünyasının Ali Ordeni”nin dizayn müəllifidir.