SİYASƏT
Qərbin Ermənistandakı hadisələrə biganəliyi “demokratik dəyərlər”in hamı üçün tətbiq olunmamasından xəbər verir
Bakı, 18 iyun, AZƏRTAC
Bu günlərdə Ermənistanın siyasi gündəmində aktivlik artıb. “Çiçəklənən Ermənistan” partiyasının sədri və Ermənistan parlamentindəki “Sarukyan” fraksiyasının lideri Qaqik Sarukyan deputat toxunulmazlığından məhrum edilib. Ermənistanın kütləvi informasiya vasitələrinin yaydığı məlumata görə, qanunverici orqan iyunun 16-da bununla bağlı Baş Prokurorluğun verdiyi vəsatətə baxaraq qərar qəbul edib. Q.Sarukyanın deputat toxunulmazlığının ləğvinin lehinə 87 deputat səs verib. Əleyhinə və bitərəf olmayıb. Parlamentdə olan müxalifətçı deputatlar - “Çiçəklənən Ermənistan” və “İşıq Ermənistan” partiyalarının təmsilçiləri isə səsverməni boykot ediblər.
Məsələyə münasibət bildirən İslahatçı Qadınlar və İnnovasiyalar İctimai Birliyinin sədri Vüsalə Hüseynli bildirib ki, son günlər Ermənistanın siyasi gündəmində baş verənlər rəsmi Yerevanın, xüsusilə baş nazir Paşinyanın narahatlığından xəbər verir. Məlum olduğu kimi, Q.Sarukyan bir müddət öncə ölkənin təhlükəsizlik qüvvələri tərəfindən ifadə vermək üçün istintaqa cəlb edilmişdi. Bunun ardınca onun mandatdan məhrum edilərək toxunulmazlığının ləğvi Sarukyanın yaxın günlərdə həbs ediləcəyinə işarə edir. Artıq sabiq deputata qarşı irəli sürülən ittihamla bağlı 250 nəfərdən çox insanın polis nəzarətinə götürülməsi prosesin davam edəcəyini deməyə əsas verir.
QHT sədrinin sözlərinə görə, Sarukyana qarşı bu gün baş verənlər onun mütəmadi olaraq Paşinyan hakimiyyətini tənqid etməsindən sonra start verilib. Çiçəklənən Ermənistan” partiyasının liderinin təzyiqlərə məruz qalması baş verənlərin siyasi təqib olduğunu sübut edir. Q.Sarukyanın tərəfdarlarının Ermənistan parlamentinin önündə etiraz aksiyası keçirməyə cəhd göstərən zaman ölkənin təhlükəsizlik qüvvələri tərəfindən onların qarşısının kobudluqla alınması, aksiyanı işıqlandıran jurnalistlərə qarşı çox kobud davranaraq güc tətbiq edilməsi prosesin N.Paşinyanın birbaşa göstərişi ilə həyata keçirilməsini təsdiqləyir. Ancaq çox maraqlıdır ki, baş verən bu qədər ciddi hadisələrə Qərbin demokratik təsisatları tərəfindən heç bir reaksiya bildirilmədi. Halbuki Ermənistanda insan hüquqlarının kobud şəkildə pozulmasına münasibət mütləq şəkildə bildirilməli və Ermənistan rəsmilərinə bununla bağlı xəbərdarlıq edilməli idi. Lakin bu gün Avropanın, Qərbin prosesləri sakit şəkildə izləyərək heç bir reaksiya verməməsi sözdə təzyiq mexanizmi olan “demokratik dəyərlərin” hamı üçün tətbiq olunmamasından xəbər verir. Bu, Qərbin, Avropanın Ermənistana münasibətdə sərgilədiyi ilk mövqe deyil. Müxalif siyasətçi və jurnalist Mher Yeqizaryan həbsxanada keçirdiyi aclıq aksiyasından sonra vəfat etdikdə də bu qurumlar sükutlarını pozmamışdılar. İndi gəlin müqayisə edək. Buna bənzər situasiya Azərbaycanda baş versəydi rəsmi Bakı 24 saatda 8 bəyanat alardı. Bəs o halda son zamanlar diktator kimi tanınan N.Paşinyana qarşı bu sevginin qaynağı nədir? Niyə populist çıxışları ilə tanınan N.Paşinyan hakimiyyətə gəldikdən sonra demokratiya adı altında ölkənin tanınmış siyasi və ictimai xadimlərinə qarşı olan repressiv vasitələrdən geniş şəkildə istifadə etməsinə göz yumulur? Güclü liderlərin bir-bir sıradan çıxararaq zərərsizləşdirməsi heç bir beynəlxalq təşkilatı, demokratik dəyərləri müdafiə edənləri narahat etmirmi? Dünya Paşinyanın öz siyasi rəqiblərini bir-bir həbsə atmasına, onları “asfalta uzatmaqla” hədələməsinə göz yumur? Bütün bunların bir məntiqi cavabı var. Hər bir demokratiya tələbinin ardında bir istək, maraq dayanır. Bu gün Paşinyan bu qurumların maraqlarını erməni xalqının marağından üstün tutduğu üçün “demokratik dəyərlər”in müdafiəçiləri də onun etdiyi qanunsuzluqlara, insan hüquqlarını alt-üst etməsinə sükutla yanaşmağa üstünlük verirlər.