CƏMİYYƏT
Qeyri-formal əmək münasibətlərinin qarşısının alınması sahəsində beynəlxalq təcrübənin öyrənilməsinə dair konfrans keçirilir
Bakı, 30 may, AZƏRTAC
Əmək və Əhalinin Sosial Müdafiəsi Nazirliyi və Beynəlxalq Əmək Təşkilatının (BƏT) birgə təşkilatçılığı, sosial tərəfdaşların iştirakı ilə “Qeyri-formal əmək münasibətlərinin qarşısının alınması məqsədilə əmək qanunvericiliyinin təkmilləşdirilməsi sahəsində beynəlxalq təcrübə” mövzusunda konfrans keçirilir.
Nazirliyin ictimaiyyətlə əlaqələr şöbəsindən AZƏRTAC-a verilən məlumata görə, tədbiri giriş sözü ilə açan əmək və əhalinin sosial müdafiəsi nazirinin müavini İdris İsayev ölkə Prezidenti İlham Əliyevin uğurlu sosial-iqtisadi inkişaf strategiyasının layiqli əməyin təmin olunması istiqamətində mühüm addımların atılmasına imkan yaratdığını vurğulayıb. BƏT-lə birgə icra olunan “2016-2020-ci illər üçün Layiqli Əmək üzrə Ölkə Proqramı”ndan bəhs edən nazir müavini BƏT-in layiqli əmək konsepsiyasının reallaşdırılması sahəsində ölkəmizdə aparılan işləri qeyd edib.
Konfransda bildirilıb ki, Azərbaycan Prezidentinin 2017-ci il 9 oktyabr tarixli 3287 nömrəli Sərəncamı ilə təsdiq edilmiş “Azərbaycan Respublikasında qeyri-rəsmi məşğulluğun qarşısının alınmasına dair Tədbirlər planı”na uyğun olaraq normativ hüquqi aktların, inzibatçılığın təkmilləşdirilməsi, nəzarət tədbirlərinin gücləndirilməsi, monitorinq və qiymətləndirmə sisteminin qurulması, məlumatlandırma və təbliğat işlərinin təşkili ilə bağlı 36 tədbirin həyata keçirilməsi nəzərdə tutulub və həmin tədbirlərin hər biri üzrə sosial tərəfdaşlarla fəal əməkdaşlıq müstəvisində müvafiq işlər aparılır, həmçinin təbliğat-maarifləndirmə işlərinə xüsusi əhəmiyyət verilir.
Qeyri-formal məşğulluğun qeyri-formal iqtisadiyyatın tərkib hissəsi olduğunu bildirən nazir müavini qeyd edib ki, dünyanın bütün ölkələrində qeyri-formal məşğulluq mövcuddur və BƏT-ə üzv ölkələrin yalnız 47-də qeyri-formal məşğulluğun statistikası aparılır. Qanunvericiliyin tələblərinə zidd olan qeyri-formal məşğulluq vergi, sosial sığorta və digər məcburi ödənişlərin həyata keçirilməməsinə səbəb olmaqla, nəticədə, dövlət büdcəsi üçün böyük itkilər yaradır, eyni zamanda, işçiləri cari və gələcək sosial təminat hüquqlarına malik olmaqdan məhrum edir. Yəni qeyri-formal məşğulluq sektorunda çalışan işçilərin dövlətin sosial müdafiə sisteminə çıxışı heç bir halda mümkün olmur.
Nazir müavini konfransın qeyri-formal məşğulluğun qarşısının alınması üçün sosial tərəfdaşlarla birgə fəaliyyətin daha səmərəli təşkili üçün dünyada mövcud olan qabaqcıl beynəlxalq təcrübədən irəli gələn yanaşmaların öyrənilməsi və müvafiq mövzuda səmərəli müzakirələrin aparılması baxımından əhəmiyyətini vurğulayıb.
Azərbaycan Respublikasının Sahibkarlar (İşəgötürənlər) Milli Konfederasiyasının (ASK) vitse-prezidenti Vüqar Zeynalov və Azərbaycan Həmkarlar İttifaqları Konfederasiyası (AHİK) sədrinin müavini Cavanşir Alxasov və BƏT-in Layiqli Əməyə Texniki Dəstək Qrupunun, Şərqi Avropa və Mərkəzi Asiya üzrə Ölkə ofisinin əmək haqqı üzrə mütəxəssisi Nikolas Ştuder çıxış edərək mövzu ilə əlaqədar fikirlərini ifadə ediblər.
Konfransın gündəliyinə Nikolas Ştuderin “Bugünkü iş dünyasında qeyri-standart məşğulluq formaları”, “Beynəlxalq təcrübədə əmək münasibətləri anlayışı”, Əmək və Əhalinin Sosial Müdafiəsi Nazirliyinin əmək siyasəti şöbəsinin müdir müavini Əbülfət Məhərrəmovun “Əmək münasibətlərinin yanlış təsnifatı haqqında”, Şeffield Universitetinin professoru Yason Heysin “Avropa İttifaqında qanunvericiliyin tətbiqinə məsul orqanların təcrübəsi” və s. mövzularda təqdimatlar edilməsi, “Təcrübədə konkret halların təhlili”, “Azərbaycanda əmək qanunvericiliyinin təkmilləşdirilməsi üzrə təkliflər” mövzularında qrup formatında müzakirələrin aparılması daxildir.
Konfrans İki gün davam edəcək.