İQTİSADİYYAT
Qeyri-neft ixracının artımı iqtisadi inkişafa yönəlmiş silsiləli tədbirlərin həyata keçirilməsi sayəsində baş verib
Bakı, 19 aprel, AZƏRTAC
Qeyri-neft ixracının artımı təsadüfi hal deyil, bu uğurun əsası 10-15 il əvvəllər qoyulmuş və iqtisadi inkişafa yönəlmiş silsiləli tədbirlərin həyata keçirilməsi sayəsində baş verib. Son bir neçə ildə dərin iqtisadi islahatların sayəsində əldə olunan nəticələr daha səmərəli olmuşdur.
Bunu AZƏRTAC-a “Azexport” portalının rəhbəri Zaur Qardaşov Azərbaycanın qeyri-neft ixracının 15 il ərzində dörd dəfədən çox artmasını şərh edərək bildirib. Ekspert iqtisadi inkişafa dair aparılan tədbirləri üç əsas istiqamətə ayırıb. İlk olaraq infrastruktura investisiya, biznesin kreditləşməsi və istehsalyönümlü investisiyaların təşviqi. Burada bir sıra önəmli ardıcıl tədbirlər həyata keçirilib. Məsələn - investisiya təşviqi sənədinin verilməsi, xüsusi iqtisadi zonaların yaradılması, sənaye parkları, sənaye zonalarının, aqroparkların yaradılması, kənd təsərrüfatının vergilərdən azad edilməsi və subsidiyaların tətbiqi. Maliyyə əlçatanlığın artırılması məqsədilə Kredit Zəmanət Fondu, Kredit Bürosu və Daşınar əmlakın Reyestri yaradılıb.
İkinci əsas istiqamət biznes mühitinin yaxşılaşdırılması və biznesin idarə edilməsidir. Hazırda Azərbaycan biznesin qeydiyyatına görə dünyada ilk 10-luqda qərarlaşmışdır, onlayn hesabatlılıq, lisenziyaların və icazələrin alınmasının sadələşdirilməsi və elektron həyata keçirilməsi, tikinti üçün icazələr və kommunikasiyaya qoşulmanın sadələşməsi əlverişli işgüzar mühitin əsas amilləridir. Bütün növ yoxlamalara moratoriumun tətbiqi biznes mühiti daha da müstəqil edir. Kiçik və orta sahibkarlığa dəstək məqsədilə Kiçik və Orta Sahibkarlıq Agentliyi yaradılıb.
Xarici ticarətin liberallaşdırılması istiqamətində həyata keçirilən tədbirlər də tez bir zamanda öz təsirini göstərib. Rəqəmsal Ticarət Qovşağının yaradılması və onun üzərindən Vahid ixrac ərizəsinin tətbiqi bu sahədə ən vacib yeniliklərdən biridir. Sistem sayəsində ixrac üçün tələb olunan bütün icazələrin alınması, gömrük prosedurlarının sadələşdirilməsi həyata keçirilir. Bundan əlavə ixrac missiyalarının təşkili, ixrac edilən məhsullar üçün subsidiyalar, xarici bazarların marketinq tədqiqatları üçün subsidiyalar mexanizmi işə salınıb.
“Azexport.az” portalının fəaliyyəti sayəsində ixrac edilən məhsulların coğrafiyası və çeşidi bir neçə dəfə artıb. Azərbaycan məhsullarının beynəlxalq elektron ticarət platformalarında təmsil olunma əmsalı 60 dəfə artıb. Sərbəst Satış Sertifikatının verilməsi əvvəllər ixracı mümkün olmayan Azərbaycan məhsullarının 120-dən artıq ölkəyə ixracını təmin edəcək.