SİYASƏT
Qırğızıstandakı diplomatik nümayəndəliklərin rəhbərləri ilə görüşdə Ermənistanın Azərbaycana qarşı son terror aktları barədə danışılıb
Bişkek, 14 noyabr, АZƏRTAC
Qırğız Respublikası Prezidentinin səlahiyyətlərini icra edən Baş nazir Sadır Japarov ölkədə akkreditə olunmuş diplomatik nümayəndəliklərin rəhbərləri ilə görüş keçirib.
Sadır Japarov 5-10 oktyabr tarixlərində ölkədə baş vermiş hadisələrdən sonra ictimai-siyasi durum, keçiriləcək seçkilər və qarşıda duran vəzifələr haqqında diplomatik nümayəndəliklərin rəhbərlərinə məlumat verib.
Görüş zamanı söz yalnız Azərbaycanın Qırğızıstandakı səfiri Hidayət Orucova və BMT-nin ölkədəki rezident-əlaqələndiricisi Ozonia Ojielloya verilib.
Səfir diplomatik korpusun ölkədə baş vermiş siyasi-ictimai hadisələrdən çox narahat olduğunu qeyd edərək proseslərin qısa müddətdə sakit məcraya qayıtmasından məmnunluğunu bildirib, qardaş ölkənin tezliklə inkişaf və tərəqqi yoluna çıxacağına inandığını ifadə edib.
Sonra Ermənistanın Azərbaycana qarşı törətdiyi son terror aktlarının dəhşətləri görüş iştirakçılarının diqqətinə çatdırılıb: “Bu gün diplomatik korpus adından çıxış etsəm də, Ermənistan silahlı qüvvələri tərəfindən təcavüzə məruz qalan Azərbaycan əraziləri haqqında bir neçə söz deməyə bilmərəm. Bildiyiniz kimi, Azərbaycan bir daha Ermənistan tərəfindən terrora məruz qaldı. İşğal altındakı Azərbaycan ərazilərində məğlubiyyətlə üzləşən Ermənistan beynəlxalq hüququn norma və prinsiplərini kobud şəkildə pozdu. Ermənistan silahlı qüvvələri döyüş bölgəsindən yüzlərlə kilometr məsafədə yerləşən mülki yaşayış məntəqələrinə hücum etdi. Azərbaycanın ikinci böyük şəhəri Gəncəni bütün insanlar yuxuda ikən gecə saatlarında raket atəşinə tutdu. Ermənilərin yaşayış məntəqələrimizi sentyabrın 27-dən noyabrın 10-dək atəşə tutması nəticəsində 94 mülki şəxs həlak olub, 407 nəfər yaralanıb, 3326 yaşayış binasına, 120 çoxmərtəbəli binaya, uşaq bağçaları və məktəblər daxil olmaqla 504 mülki infrastruktur obyektinə ciddi ziyan dəyib”.
Məlumat verilib ki, Azərbaycan vətəndaşları Ermənistan tərəfindən törədilən ağır terror cinayətləri ilə üzbəüz qaldığı günlərdə də qardaş Qırğızıstanda baş verən hadisələri ürəkağrısı ilə müşahidə edib. Həmin günlərdə Azərbaycandan yüzlərlə insan, məmurlar, tanınmış ziyalılar və sadə vətəndaşlar səfirliyimizə zəng vurub və Qırğızıstandakı vəziyyətdən narahatlıqlarını ifadə ediblər.
Bildirilib ki, ölkələrimizi və xalqlarımızı etnik və tarixi əlaqələr birləşdirir, ortaq dil, mədəniyyət, ənənələr və adətlər sıx əməkdaşlıq üçün böyük imkanlar yaradır. Ölkələrimiz arasında münasibətlərin dərinləşməsi və genişləndirilməsi Azərbaycan Prezidenti İlham Əliyevin siyasətinin prioritet istiqamətidir.
Qeyd edək ki, səfir Hidayət Orucovun çıxışı bu ölkənin kütləvi informasiya vasitələrində geniş işıqlandırılıb.
Qulu Kəngərli
AZƏRTAC-ın xüsusi müxbiri
Bişkek