Bakı, 15 fevral, AZƏRTAC

Qırğızıstanın sabiq prezidenti Almazbek Atambayev ölkəni tərk edərək müalicə üçün xaricə yollanıb.

AZƏRTAC Qırğızıstan mediasına istinadla xəbər verir ki, Almazbek Atambayev bu gün Birləşmiş Ərəb Əmirliklərinə yola düşüb, oradan isə müayinə və müalicə üçün İspaniyaya gedəcək.

Sabiq prezident fevralın 14-də məhkəmənin yeni qərarı əsasında azadlığa buraxılıb və onun yerdəyişməsinə qoyulan məhdudiyyətlər aradan qaldırılıb. Almazbek Atambayev elə həmin gün müayinə və müalicə kursu keçmək üçün İspaniyaya gedəcəyini və bərpa prosesindən sonra vətəninə qayıtmaq niyyətində olduğunu bildirib.