İQTİSADİYYAT


Qiymətli Kağızlar üzrə Dövlət Komitəsi ilə MONEYVAL arasında əməkdaşlığın genişləndirilməsi imkanları müzakirə olunmuşdur

Bakı, 17 fevral (AZƏRTAC). Qiymətli Kağızlar üzrə Dövlət Komitəsində (QKDK) Avropa Şurasının pulların yuyulmasına və terrorçuluğun maliyyələşdirilməsinə qarşı tədbirlərin qiymətləndirilməsi üzrə ekspertlər komitəsinin (MONEYVAL) qiymətləndirmə missiyası ilə görüş keçirilmişdir.

QKDK-nın ictimaiyyətlə əlaqələr sektorundan AZƏRTAC-a bildirmişlər ki, missiyanın məqsədi MONEYVAL-ın daxili prosedur qaydalarına uyğun olaraq Azərbaycanda maliyyə sisteminin cinayət yolu ilə əldə edilmiş pul vəsaitlərinin leqallaşdırılması və terrorçuluğun maliyyələşdirilməsi (PY/TMM) risklərinə qarşı həssaslığını beynəlxalq standartlar əsasında qiymətləndirməkdən ibarətdir.

Görüşdə çıxış edən QKDK sədri Rüfət Aslanlı Azərbaycan hökumətinin MONEYVAL ilə əlaqələrə xüsusi önəm verdiyini və mövcud məhsuldar əməkdaşlıq çərçivəsində ölkədə PY/TMM sisteminin beynəlxalq standartlara uyğun qurulması istiqamətində islahat gündəliyinin hazırlanaraq uğurla icra edildiyini diqqətə çatdırmışdır. R.Aslanlı 2008-ci ildə həyata keçirilmiş son qiymətləndirmədən sonra müvafiq sahə üzrə effektiv hüquqi normativ bazanın yaradılması, institusional potensialın artırılması və beynəlxalq əməkdaşlığın genişləndirilməsi istiqamətində görülmüş işlər barədə görüş iştirakçılarına ətraflı məlumat vermişdir.

Missiyanın rəhbəri Con Beyker Azərbaycan ilə MONEYVAL arasında əməkdaşlığın hazırkı səviyyəsindən məmnunluğunu ifadə edərək son illərdə ölkədə PY/TMM sahəsində həyata keçirilmiş əhəmiyyətli hüquqi və institusional quruculuq işlərini yaxından izlədiyini vurğulamışdır. O, hazırkı qiymətləndirmə çərçivəsində əsas diqqətin mövcud PY/TMM sisteminin effektiv tətbiqi mexanizmlərinə yetiriləcəyini bildirmişdir.

Sonda qarşılıqlı əməkdaşlıq əlaqələrinin genişləndirilməsi istiqamətində ətraflı müzakirələr aparılmışdır.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.