Qlobal neft tələbatı cari ildə gündəlik 90 milyon barreldən çox olacaq

Bakı, 11 noyabr, AZƏRTAC 

2020-ci ildə qlobal xam neft tələbatı ötən ilə görə 9 milyon 750 min barrel azalaraq sutkada 90 milyon 10 min barrel təşkil edəcək.

AZƏRTAC xəbər verir ki, bu barədə OPEC-in aylıq hesabatında deyilir.

Bildirilir ki, il ərzində OPEC-ə üzv ölkələrin neft tələbatı keçən ilə nisbətən 7 milyon 200 min barrel azalaraq gündəlik 22 milyon 100 min barrelə olacaq.

2021-ci ildə isə qlobal neft tələbatı cari illə müqayisədə 6 milyon 250 min barrel artaraq gündəlik 96 milyon 260 min barrelə çatacaq. Gələn il OPEC ölkələrinin neft tələbatı bu ilə nisbətən 5 milyon 200 min barrel çoxalaraq gündəlik 27 milyon 400 min barrelə yüksələcək.