CƏMİYYƏT


“Qobu Park”da məcburi köçkünlər üçün ödənişsiz göz müayinəsi keçirilib

Bakı, 2 noyabr, AZƏRTAC

Heydər Əliyev Fondunun təşəbbüsü, Azərbaycan Respublikasının Birinci vitse-prezidenti xanım Mehriban Əliyevanın tapşırığı ilə Qaradağ rayonunda məcburi köçkünlər üçün salınmış “Qobu Park” yaşayış kompleksində humanitar tibbi aksiya keçirilib. Tədbir iki gün davam edib.

Qaçqınların və Məcburi Köçkünlərin İşləri üzrə Dövlət Komitəsindən AZƏRTAC-a bildiriblər ki, bu qurumun dəstəyi ilə Türkiyənin “Dünyagöz” xəstəxanalar qrupunun Bakı təmsilçiliyinin təşkil etdiyi aksiyada 300-ə yaxın məcburi köçkünün ödənişsiz oftalmoloji müayinəsi aparılıb.

Humanitar tibbi aksiyanın məqsədi məcburi köçkünləri müayinə edərək onların görmə ilə bağlı problemlərini aşkar etmək və həllinə kömək göstərmək olub. Müayinəni xəstəxananın müxtəlif oftalmoloji xəstəliklər üzrə ixtisaslaşmış tibbi heyəti aparıb. Görmə qabiliyyətində problem aşkar edilənlərə müvafiq müalicə təyin olunub. Onlardan bəzilərinə eynək yazılıb.

Məcburi köçkünlər daha ağır və ya cərrahi əməliyyat tələb edən göz problemlərinin “Dünyagöz”də müalicə imkanları barədə məlumatlandırılıb, müvafiq göndərişlər verilib.

Ağır göz xəstəliyi aşkarlanmış məcburi köçkünlərə “Dünyagöz” xəstəxanasında əməliyyat olunmaq üçün güzəşt ediləcək.

Aksiya məcburi köçkünlər tərəfindən böyük rəğbətlə qarşılanıb. Onlar humanitar aksiyaların keçirilməsinə görə Prezident İlham Əliyevə və Birinci vitse-prezident xanım Mehriban Əliyevaya təşəkkür ediblər.

Humanitar aksiyaların məcburi köçkünlər yaşayan digər qəsəbələrdə də keçirilməsi nəzərdə tutulub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.