REGİONLAR
Qubada azaraq kəndə girən ayı balası Vəhşi Təbiətin Bərpası və Müalicə Klinikasına təhvil veriləcək VİDEO
Quba, 3 may, Elxan Yusifli, AZƏRTAC
Mayın 3-ü səhər saatlarında Quba rayonu, Qırızdəhnə kəndi ərazisində ayı balası aşkarlanıb.
AZƏRTAC xəbər verir ki, ərazidə xidmət aparan Quba Rayon Polis Şöbəsinin əməkdaşları və kənd sakinləri anasından ayrı düşmüş ayı balasını tutaraq təhlükəsiz yerə aparıblar.
Ayı balası Ekologiya və Təbii Sərvətlər Nazirliyinin Xızı rayonunda yerləşən Vəhşi Təbiətin Bərpası və Müalicə Klinikasına təhvil veriləcək.
Vəhşi Təbiətin Bərpası və Müalicə Klinikası 2006-cı ildən fəaliyyət göstərir. Mərkəz ölkəmizin ərazisində, o cümlədən Xəzər dənizinin Azərbaycan sektorunda müxtəlif səbəblərdən zərər çəkmiş vəhşi heyvanların reabilitasiyası, artırılması, baytarlıq və profilaktika tədbirlərinin keçirilməsi məqsədilə yaradılıb.
Xızı rayonunun Altıağac qəsəbəsində yerləşən bərpa mərkəzində son 10 ildə 500-dən çox heyvan və quş müalicə olunaraq, yenidən təbiətə buraxılıb.