REGİONLAR


Qubada inşa olunan 48 mənzilli yaşayış binası gələn il sakinlərin istifadəsinə veriləcək VİDEO

Quba, 23 avqust, Elxan Yusifli, AZƏRTAC 

Quba şəhərində istismar müddəti başa çatan çoxmənzilli binaların sakinlərinin mənzil-məişət şəraitini yaxşılaşdırmaq məqsədilə tikilən 48 mənzilli yeni yaşayış binası gələn il sakinlərin istifadəsinə veriləcək.

AZƏRTAC-ın bölgə müxbiri xəbər verir ki, Prezident İlham Əliyevin “Quba şəhərində əhalinin mənzil-məişət şəraitinin yaxşılaşdırılmasına dair tədbirlər haqqında” Sərəncamı ilə inşa olunan bina 4 mərtəbəlidir. İki girişdən ibarət çoxmənzilli binanın ümumi sahəsi 980 kvadratmetrdir.

Molla Pənah Vaqif küçəsində inşa olunan çoxmənzilli binanın tikintisinə apreldən başlanılıb. Hazırda binanın 3-cü mərtəbəsində dəmir konstruksiyaların quraşdırılması və betonlama işləri aparılır.

Baş mühəndis Bəhmən Hüseynov bildirib ki, 48 mənzildən 20-si üç, 16-sı iki, 12-si isə bir otaqlıdır. Mənzillərin hər biri müasir standartlara uyğun istilik və elektrik sistemi ilə təchiz olunacaq və tam təmirli şəkildə əhalinin istifadəsinə veriləcək.

Sentyabr ayından binada mişar daşı ilə hörgüyə başlanılacaq. Tikintidə əsasən yerli tikinti materiallardan istifadə olunur. İnşaat işlərində 60-dək rayon sakini işlə təmin edilib.

Binanın həyətində müasir qazanxana, avtomobil dayanacağı və sakinlərin istirahəti üçün park yaradılacaq.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.