Quba, 11 mart, Elxan Yusifli, AZƏRTAC

Dövlət Miqrasiya Xidmətinin yaradılmasının ildönümü ilə bağlı təsdiq olunmuş tədbirlər planına əsasən, martın 11-də Azərbaycan Dövlət Pedaqoji Universitetinin Quba filialında müəllim, professor heyəti və tələbələrlə görüş keçirilib.

AZƏRTAC xəbər verir ki, Xidmətin aparatının səlahiyyətli nümayəndələrinin iştirakı ilə keçirilən maarifləndirmə xarakterli tədbirdə miqrasiya sahəsindəki yeniliklər və qanunvericilikdəki dəyişikliklərlə bağlı məlumat verilib.

Görüşün əvvəlində “Avropanın miqrant problemi qarşısında acizliyi fonunda miqrasiya sahəsində idarəetmənin mütərəqqi Azərbaycan modeli” mövzusunda məruzə təqdim olunub. Məruzədə qeyd olunub ki, bu gün dünyada daha çox miqrant böhranından danışılır. Xarici müdaxilədən əziyyət çəkən, xüsusən Yaxın Şərqdən olan insanlar özlərinin, ailələrinin canlarını qurtarmaq üçün məcburi köçkün, qaçqın vəziyyətinə düşüblər. Onlar böyük əzablara qatlaşıb, ciddi təhlükələrlə baxmayaraq, Avropaya üz tuturlar. Təəssüf ki, həmin insanlara münasibət heç də Avropanın bəyan etdiyi prinsiplərə uyğun gəlmir. Çünki bir çox Avropa ölkələri multikulturalizm prinsiplərindən imtina ediblər. Buna səbəb kimi mürəkkəb kulturoloji vəziyyət göstərilir. Belə bir dönəmdə 2016-cı ilin Azərbaycanda “Multikulturalizm ili” elan edilməsi mühüm əhəmiyyət daşıyır.

Tədbirdə Prezident İlham Əliyevin imzaladığı fərmana əsasən, 2009-cu il iyulun 1-dən miqrasiya proseslərinin idarə olunmasında “bir pəncərə” prinsipinin tətbiq edildiyi, Dövlət Miqrasiya Xidmətinin fəaliyyət istiqamətləri və əldə olunmuş nəticələr diqqətə çatdırılıb. Qeyd olunub ki, bu gün Azərbaycana təşrif buyuran əcnəbilərin ölkədə ilk müraciət etdiyi qurumlardan biri məhz Dövlət Miqrasiya Xidmətidir. Xidmət ölkədə əcnəbilərin və vətəndaşlığı olmayan şəxslərin olduğu yer üzrə qeydiyyatı, müvəqqəti olma, müvəqqəti və daimi yaşama, iş icazələrinin verilməsi və müddətlərinin uzadılması, qaçqın statusunun müəyyənləşdirilməsi, vətəndaşlığa qəbul, xitam, bərpa, vətəndaşlıq mənsubiyyətinin müəyyən olunması, eləcə də vətəndaşlıq məsələlərinin həlli ilə məşğul olan hüquq mühafizə orqanı statusunu daşıyır.

Görüşdə respublikamızda vətəndaşsızlıq hallarının aradan qaldırılması istiqamətində atılan addımlara, regionlarda keçirilmiş çoxsaylı tədbirlərin konkret nəticələrinə toxunulub. Bildirilib ki, Azərbaycan Respublikası Prezidentinin 2008-ci il 6 mart tarixli Fərmanına müvafiq olaraq Dövlət Miqrasiya Xidmətinin vətəndaşlıq məsələlərində iştirakı təmin edilib və həmin vaxtdan indiyədək Azərbaycan Respublikası Prezidentinin sərəncamları ilə 1434 nəfər Azərbaycan vətəndaşlığına qəbul edilib. Bununla belə, bu müddət ərzində 36 min 467 şəxsin Azərbaycan Respublikası vətəndaşlığına mənsubiyyəti tanınıb və onlar müvafiq dövlət qurumu tərəfindən Azərbaycan Respublikası vətəndaşının şəxsiyyətini təsdiq edən sənədlərlə təmin olunublar.

Diqqətə çatdırılıb ki, Azərbaycan Prezidenti vətəndaşların hüquq və azadlıqlarının daha yaxşı təmin edilməsinə, insanların arzu və istəklərini, eyni zamanda, cəmiyyətin problemlərini özündə əks etdirən vətəndaş müraciətlərinə diqqətin artırılmasına böyük əhəmiyyət verir. Bu baxımdan “Vətəndaşların müraciətləri haqqında” Azərbaycan Respublikasının 2015-ci il 30 sentyabr tarixli Qanunu və bu qanunun tətbiqi barədə 12 noyabr tarixli Fərman xüsusi qeyd edilməlidir.

Tədbirdə sahibkarlıq fəaliyyəti göstərən fiziki və hüquqi şəxslərin şikayətlərinə baxılması sahəsində şəffaflığın və obyektivliyin təmin edilməsi, bu sahədə şəxslərin hüquqlarının və qanunla qorunan maraqlarının müdafiəsi məqsədi ilə yeni yaradılan Dövlət Miqrasiya Xidmətinin Apellyasiya Şurasının fəaliyyəti barədə də məlumat verilib.

Görüşdə bu il martın 1-dən qüvvəyə minmiş yeni İnzibati Xətalar Məcəlləsindəki yeniliklər haqqında da izahedici söhbət aparılıb, suallar cavablandırılıb.