REGİONLAR


Qubadlı məktəbliləri “Ölkəmizi tanıyaq” layihəsi çərçivəsində cənub bölgəsinə yollanıblar

Sumqayıt, 26 mart, Ətrabə Rzayeva, AZƏRTAC

Azərbaycan Prezidenti İlham Əliyevin tövsiyəsinə əsasən ümumtəhsil məktəblərinin 9-11-ci sinif şagirdləri üçün “Ölkəmizi tanıyaq” devizi altında keçirilən maarifləndirici tur-aksiyaların növbəti mərhələsinə başlanılıb.

AZƏRTAC xəbər verir ki, martın 26-da tur-aksiyaya Qubadlı rayon məktəbliləri də qoşulublar. Tədris prosesində biliyi və istedadı ilə seçilən nümunəvi 20 məktəbli və onları müşayiət edən 2 müəllim dörd gün müddətində Lənkəran-Masallı-Astara rayonları ilə tanış olacaqlar.

Yolasalma mərasimində rayon icra hakimiyyətinin məsul şəxsləri, təhsil işçiləri və valideynlər iştirak ediblər. Tur-aksiya iştirakçılarına yaxşı yol arzulayan Qubadlı Rayon İcra Hakimiyyəti başçısının müavini Xoşqədəm Alıyeva bildirib ki, artıq 5 ildir həyata keçirilən “Ölkəmizi tanıyaq” tur-aksiyası gənclərin vətənpərvərlik, tarixi–mədəni irsimizə hörmət ruhunda tərbiyə olunması, məktəblilərin dünyagörüşlərinin daha da zənginləşdirilməsi məqsədi daşıyır.

Qeyd olunub ki, şagirdlər tur-aksiyada vaxtlarını səmərəli keçirməklə yanaşı, Azərbaycanın cənub bölgəsinin qədim tarixi-memarlıq abidələri, muzey və mərkəzləri ilə yaxından tanış olacaq, yeni dostlar qazanacaqlar.

Tur-aksiya çərçivəsində Lənkəran rayonunda “Qoşa qala” qapıları, Həzi Aslanovun ev-muzeyi, Hirkan Milli Parkı, Xanbulan gölü, Astarada şəhər bulvarı və “Astaraçay” çay fabriki, Masallıda Tarix-Diyarşünaslıq Muzeyi, Dövlət Rəmzləri Muzeyi, “ASAN həyat” kompleksi ilə tanışlıq məktəblilərin yaddaşında dərin izlər buraxacaq.

Sonda Qubadlı məktəbliləri xüsusi avtobusla yola çıxıblar.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.