CƏMİYYƏT


Qubernator: Gürcüstanda yaşayan azərbaycanlılar tarixən bu ölkənin ictimai-siyasi həyatında fəal rol oynayıblar

Tbilisi, 10 noyabr, AZƏRTAC

Gürcüstanda yaşayan azərbaycanlılar tarixən bu ölkənin ictimai-siyasi həyatında fəal rol oynayıblar. Bu gün azərbaycanlı gənclər Gürcüstanın Avropaya inteqrasiyasında fəal rol oynayırlar.

AZƏRTAC xəbər verir ki, bu sözləri Gürcüstanın azərbaycanlıların yığcam yaşadığı Kvemo Kartli-Borçalı bölgəsinin qubernatoru Şota Rexviaşvili Gürcüstan Müsəlmanları İdarəsinin illik hesabatına həsr olunmuş tədbirdə söyləyib.

Qubernator deyib: “Azərbaycanlılar hər zaman Gürcüstanda bütün sahələrdə fəal olublar. Gürcüstanda deputat olmuş etnik azərbaycanlı Pərixanım Sofiyeva buna parlaq nümunədir. O, müsəlman dünyasında deputat seçilən ilk qadındır. Bu, onu göstərir ki, Gürcüstanda yaşayan azərbaycanlılar tarixən ölkənin ictimai-siyasi həyatında yüksək fəallıqları ilə seçiliblər”.

Azərbaycanlı gənclərin fəal olmalarını yüksək qiymətləndirən Ş.Rexviaşvili onların cəmiyyətin bütün sahələrində inteqrasiyası üçün dövlət dilinin öyrənmələrinin vacibliyini qeyd edib.

Ş.Rexviaşvili Gürcüstanda milli azlıqların hüquqlarının tam qorunduğunu bildirib. Qeyd edib ki, Gürcüstan hər zaman dini və etnik müxtəlifliyi ilə seçilib. Ölkədə müxtəlif din və millətlərin nümayəndələri tarix boyu sülh, qarşılıqlı hörmət və anlaşma şəraitində yaşayıblar. Gürcüstanda bu ənənə yaşamaqdadır və gələcəkdə daha da möhkəmləndiriləcək.

Xətayi Əzizov

AZƏRTAC-ən xüsusi müxbiri

Tbilisi

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.