ELM VƏ TƏHSİL


Qurtuluşdan başlayan zəfər yolu: Türkiyə Azərbaycan müttəfiqliyi sabitliyin qarantıdır

Bakı, 17 iyun, AZƏRTAC

İyunun 17-də Azərbaycan Milli Elmlər Akademiyasının (AMEA) Fəlsəfə və Sosiologiya İnstitutu və “İki sahil” qəzetinin birgə təşkilatçılığı ilə “Qurtuluşdan başlayan zəfər yolu: Türkiyə Azərbaycan müttəfiqliyi sabitliyin qarantıdır” mövzusunda konfrans keçirilib.

AZƏRTAC xəbər verir ki, tədbirdə Fəlsəfə və Sosiologiya İnstitutunun direktoru, fəlsəfə elmləri doktoru, professor İlham Məmmədzadə Milli Qurtuluş Gününün tarixi əhəmiyyətindən və zəfərə aparan inkişaf yolunun elmi-fəlsəfi mahiyyətindən danışıb, Cənubi Qafqazda Azərbaycanın yaratdığı reallıqların sülhə, sabitliyə yol acdığını vurğulayıb. Alim tarixi əhəmiyyət kəsb edən Şuşa Bəyannaməsinin regionun təhlükəsizliyində roluna dair təhlillər aparıb, Fəlsəfə və Sosiologiya İnstitutunun ölkəmizdə aparılan siyasi proseslərə daim həssaslıqla yanaşdığını, elmi-ideoloji mühitdə müntəzəm olaraq dövlətimizin strateji prioritetlərinin müzakirə edildiyini diqqətə çatdırıb.

“İki sahil” qəzetinin baş redaktoru, siyasi elmlər doktoru Vüqar Rəhimzadə tədbirdə geniş məruzə ilə çıxış edərək Azərbaycanın xilası yolunda ümummilli lider Heydər Əliyev dühasının tarixi siyasi mahiyyətinə və xilaskarlıqdan doğan zəfər tariximizə geniş nəzər salıb. V.Rəhimzadə ulu öndər Heydər Əliyevin xilaskarlıq missiyası ilə Azərbaycan xalqının həyatında yeni dövrün başlanmasını faktların dili ilə təhlil edib.

Baş redaktor qeyd edib ki, Azərbaycan üçün çox önəmli bir tarixdə - Milli Qurtuluş Günündə, Qars müqaviləsindən yüz il sonra iki dost və qardaş ölkə arasında imzalanan müttəfiqlik münasibətlərinə dair Şuşa Bəyannaməsi tarixə mühüm hadisə kimi yazıldı: “Bu tarixi sənəd iki qardaş ölkənin ümumi maraqlarının qorunmasında imkanların birləşdirilməsinin, eləcə də ortaq maraq kəsb edən regional və beynəlxalq strateji məsələlərdə fəaliyyətlərin qarşılıqlı şəkildə əlaqələndirilməsinin məntiqi nəticəsi olaraq ölkələrimizin regional və beynəlxalq rolunu, çəkisini daha da artıracaq. Sənəddə siyasi, hərbi və təhlükəsizlik sahələrində birgə fəaliyyətlərin təşviq edilməsi də xüsusi yer tutur.

Mövzu ətrafında Fəlsəfə və Sosiologiya İnstitutunun direktorunun müavini, tarix elmləri doktoru Eynulla Mədətli, fəlsəfə elmləri doktoru Füzuli Qurbanov, fəlsəfə elmləri doktoru, professor Rəna Mirzəzadə, Yeni Azərbaycan Partiyası Yasamal rayon təşkilatı Fəlsəfə və Sosiologiya İnstitutu ərazi ilk partiya təşkilatının sədri, siyasi elmlər üzrə fəlsəfə doktoru, dosent Sənan Həsənov, fəlsəfə elmləri doktorları Afaq Rüstəmova, Azər Mustafayev və digərləri çıxış edərək 1990-cı illərdə dərin siyasi böhranların əhatəsində olan Azərbaycan dövlətinin məhv olmaq təhlükəsindən növbəti dəfə xilas olunmasını çətin tarixi şəraitdə öz üzərinə götürən dahi siyasi xadim Heydər Əliyevin müdrikliyindən və yenilməz iradəsindən, Vətənə, xalqa bağlılığının təzahürlərindən, sülhə, inkişafa və sabitliyə verdiyi töhfələrdən bəhs ediblər. Azərbaycan və Türkiyə strateji müttəfiqliyinin zirvə nöqtəsi olan Şuşa Bəyannaməsinin regionda sabitliyin, təhlükəsizliyin qarantına çevrildiyini diqqətə çatdırıblar.

Siyasi elmlər üzrə fəlsəfə doktoru, dosent Günel Məlikli, fəlsəfə üzrə fəlsəfə doktoru, dosent Anar Qafarov, fəlsəfə üzrə fəlsəfə doktoru, dosent Hüseyn İbrahimov Prezident İlham Əliyevin siyasi konsepsiyasında dövlətçilik şüurumuzun inkişafına təsir edən mühüm amillərdən söz açıblar.

Xalqın xilaskarlıq missiyasında Ümummilli Liderin roluna dair elmi nəzəri fikirlər konfransın əsas ideyasına çevrilib. Şəxsiyyət və zaman kontekstində ulu öndər Heydər Əliyev fenomeninin və İlham Əliyev siyasi məharətinin bundan sonra da öyrəniləcək elmi konsepsiya olduğu iştirakçıların yekdil fikri kimi gündəmə gətirilib.

Tədbir iştirakçıları dövlət başçısının ətrafında bundan sonra da daha sıx birləşəcəklərini və elmi ictimaiyyətin qarşısında qoyulan vəzifələri məsuliyyətlə yerinə yetirəcəklərini əminliklə vurğulayıblar.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.