Bakı, 28 iyun, AZƏRTAC 

İyunun 28-də Dini Qurumlarla İş üzrə Dövlət Komitəsinin (DQİDK) və Qusar Rayon İcra Hakimiyyətinin birgə təşkilatçılığı ilə “Dini icmalar və gənclər: dini radikalizmlə mübarizə və birgə fəaliyyətin təşkili” mövzusunda ikigünlük seminar-müşavirə öz işinə başlayıb.

DQİDK-dan AZƏRTAC-a bildiriblər ki, din xadimlərinin və ictimaiyyət nümayəndələrinin iştirak etdikləri tədbirdə çıxış edən Qusar Rayon İcra Hakimiyyəti Aparatının ictimai-siyasi və humanitar məsələlər şöbəsi müdirinin müavini - dini qurumlarla işin təşkilatçısı Ceyhun Hacıyev dini radikalizmlə mübarizə sahəsində müvafiq dövlət orqanlarının həyata keçirdiyi tədbirlərin təqdirəlayiq olduğunu deyib. O, DQİDK-nın bu sahədə apardığı maarifləndirmə işini xüsusi qeyd edib. C.Hacıyev bu cür tədbirlərin əhəmiyyətini yüksək qiymətləndirib, rayondakı dini durum və dini icmaların fəaliyyəti barədə ətraflı məlumat verib.

Dövlət Komitəsi sədrinin birinci müavini Səyyad Salahlı ölkəmizin sahib olduğu dövlət-din münasibətləri modelindən, habelə dini radikalizm və dini ekstremizmin törətdiyi fəsadlardan danışıb. Qeyd edib ki, bu gün dünyanın əksər dövlətləri dini ekstremizm və terrorizmdən əziyyət çəkir. Törədilən terror hadisələri nəticəsində ictimai sabitlik pozulur, dövlətin təhlükəsizliyinə təhdidlər yaranır, vətəndaş qarşıdurması yaşanır, milyonlarla günahsız insan qətlə yetirilir, qaçqın və didərgin həyatı yaşayır, tarixi, eləcə də dini memarlıq abidələri yerlə-yeksan edilir. DQİDK sədrinin birinci müavini bildirib ki, bu gün dünyada, əsasən də müsəlman ölkələrində sabitliyin pozulmasında din amili xüsusi rol oynayır və maraqlı dairələr, beynəlxalq güclər bu amildən məharətlə istifadə edirlər.

Azərbaycanın sahib olduğu multikultural dəyərlərdən və tolerantlıq mühitindən də geniş bəhs edən natiq deyib ki, ölkəmizdə fəaliyyət göstərən dini konfessiyalar Prezident İlham Əliyevin hərtərəfli diqqət və qayğısı ilə əhatə olunublar. Dövlətimizin başçısının rəhbərliyi ilə ölkəmizdə mövcud olan ictimai-siyasi və dini sabitliyin önəmindən danışan S.Salahlı dini radikalizmə qarşı respublika miqyasında aparılan mübarizə tədbirlərinə də toxunub. Dini ekstremizmə qarşı mübarizənin gücləndirilməsi və radikallıq meyillərinin qarşısının alınması ilə bağlı müddəalar Azərbaycan Respublikasının qanunlarında da əksini tapıb. Dini radikalizm və ekstremizmlə mübarizə üsulları kimi maarifləndirici, preventiv, profilaktik və inzibati metodlardan istifadə olunur. Təcrübə təsdiqləyir ki, ölkəmizdə müxtəlif məzhəblər arasında dini tolerantlığın qorunmasında, dini radikalizmlə mübarizədə, eləcə də dini maarifçilik işinin aparılmasında dini icmaların üzərinə böyük vəzifə və məsuliyyət düşür. Bu baxımdan adıçəkilən sahələrdə dini icmaların fəaliyyətinin təşkili və əlaqələndirilməsi xüsusi əhəmiyyət kəsb edir.

Qafqaz Müsəlmanları İdarəsinin Qusar rayonu üzrə səlahiyyətli nümayəndəsi Fəryəddin Rəhimxanov keçirilən tədbirin əhəmiyyətindən danışıb və bu həssas mövzularda dini maarifləndirmə işini yüksək səviyyədə həyata keçirən Dövlət Komitəsinin rəhbərliyinə minnətdarlığını bildirib. Ölkə dindarları dövlətin, onun başçısının diqqət və qayğısından məmnunluq duyurlar. Prezident İlham Əliyevin imzaladığı müvafiq sənədlərə əsasən ayrılan vəsait hesabına son iki ildə aparılan dini maarifləndirmə işi artıq öz bəhrəsini verməkdədir.

DQİDK-nın Quba bölgəsi üzrə şöbə müdiri Eynulla Nurullayev bölgədə son illər dini radikalizmə qarşı aparılan mübarizənin müsbət nəticələrini konkret faktlar əsasında sadalayıb. Bildirib ki, əldə olunan nəticələr ölkə rəhbərliyinin din siyasətinin nə qədər düzgün və uzaqgörən olduğunu göstərir. Hamımız bu siyasətin dəqiq və ardıcıl həyata keçirilməsində fəal iştirak etməliyik.

Seminar-müşavirənin birinci günü iştirakçıları maraqlandıran sualların cavablandırılması ilə yekunlaşıb.