Heydər Əliyev tarixi şəxsiyyət, Qafqazın fəxridir. Sovet dövründə də fəxri olmuşdur, indi də fəxridir. Heydər Əliyev respublikaya yenidən rəhbərliyə çox ağır vaxtda qayıtdı, lakin o, siyasi müdrikliyi və dövləti idarə etmək istedadı sayəsində bir çox məsələləri həll edə bildi. Bunun nəticəsi kimi Azərbaycanı daha böyük gələcək gözləyir. Dövlət rəhbəri ölkənin əsas inkişaf parametrlərini və strateji xəttini artıq müəyyənləşdirmişdir. İndi böyük potensialdan istifadə edərək, işləmək lazımdır. Fikrimcə, ən əsası isə budur ki, Heydər Əliyevin müdrikliyi, onun siyasi istedadı elə ancaq Azərbaycana xeyir gətirmir, bütün Qafqazın sərvətinə çevrilmişdir. Zənnimcə, o, hələ tükənməz enerjiyə və daxili potensiala malikdir və bunlardan hamının rifahı naminə istifadə etmək lazımdır. 

Mənim üçün çox mühümdür ki, Heydər Əliyev bu çətin illərdə Azərbaycanın rəhbəri olmuşdur və indi də rəhbəridir. Çünki Azərbaycan təkcə bütün Rusiyanın qonşusu deyil, həm də Dağıstanın yaxın qonşusu və qardaşıdır. Azərbaycan və Dağıstan xalqları bir-birinə çox bənzəyən, çox yaxın olan, demək olar ki, bir xalqdır. Hətta, elə vaxt olub ki, - məsələn, Qafqaz Albaniyası dövründə, - biz bir dövlətdə yaşamışıq. Çox təəssüf ki, Heydər Əliyevin potensialından həm bütün Qafqaz, həm də ümumilikdə, bütün region üçün tam istifadə olunmamışdır.

O elə nəhəng adamdır, onun şəxsiyyəti elə çoxşaxəli və intəhasızdır ki, bu dahi insanın Dağıstan üçün, Qafqaz üçün, Rusiya üçün kim olduğunu bu gün anlamaq və qiymətləndirmək çox çətindir. Görünür, bunu bəlkə də 50 ildən sonra anlamaq, dərk etmək mümkün olacaqdır.

Regionumuzda bir sıra problemlər və həll olunmamış məsələlər var. Lakin Heydər Əliyevin hakimiyyətə gəlməsi bir çox işləri nizama saldı. Hər halda, o, münaqişələrdən, iradlardan, iddialardan yüksəkdə durdu. O, sözün əsl mənasında, İnsandır, çünki insan həyatının siyasi nəticələrdən qiymətli olduğunu başqalarından daha yaxşı bilir. Hesab edirəm ki, onun böyük müdrikliyi sayəsində qan tökülməsinə son qoyulmuşdur. O, aqil insan kimi bir vaxtlar bunu hamının başa düşəcəyinə, bütün problemlərin ədalətlə həll olunacağına inam bəsləyir. Ona ağır miras qalmış Dağlıq Qarabağ problemini yalnız Heydər Əliyev həll edə bilər. O, həmin problemi mərdanə və müdrikliklə həll edir, tam sülhü bərpa etməyə, dönməz sabitliyə nail olmağa çalışır və ən əsası, vəziyyəti nəzarətdə saxlayır.

Mən və Rusiya Xalqları Assambleyasına daxil olan bütün xalqların nümayəndələri Prezident Heydər Əliyevi 80 illik yubileyi münasibətilə ürəkdən təbrik edir, ona möhkəm cansağlığı, xoş əhval-ruhiyyə,- əslinə qalsa, bunların hamısı onda var, - arzulayırıq. Bizim hamımıza isə ondan siyasi istedad, insaniyyət, iradəlilik öyrənməyi arzu edirəm. Ona və onun bütün yaxınlarına əmin-amanlıq və uğurlar diləyirik. Belə nəhəng lider yalnız təkcə Azərbaycana deyil, bütün Qafqaza və onun hüdudlarından kənarlara da lazımdır.

Əziz Heydər Əlirza oğlu, Sizə həyatın bütün nemətlərini arzulayırıq.

Söhbəti yazdı: Asya Hacızadə,

AZƏRTAC-ın xüsusi müxbiri

Moskva