Orta təhsil bazasından (11 illik təhsil) 2004/2005–ci tədris ili üçün Azərbaycan Respublikasının dövlət və qeyri-dövlət orta ixtisas məktəblərinə sənəd qəbulunun II mərhələsi başlanmışdır.

Tələbə Qəbulu üzrə Dövlət Komissiyasından AZƏRTAC-a bildirmişlər ki, abituriyentlər sənədlərini avqustun 27-dən sentyabrın 5-dək hər gün (şənbə və bazar günləri də daxil olmaqla) saat 9.00–dan 18-dək orta ixtisas məktəblərində yaradılmış sənəd qəbulu komissiyalarına (SQK) təqdim edirlər.

Abituriyentlər sənədlərini istənilən orta ixtisas məktəbində yaradılmış sənəd qəbulu komissiyasında təqdim edə və ərizələrində seçdikləri qrupa daxil olan ixtisasları göstərə bilərlər.

SQK–yə orta təhsil haqqında sənədin əslini, şəxsiyyət vəsiqəsi və ya pasport (16 yaşı 2003-cü ilin iyulun 1-dək tamam olmayanlar doğum haqqında şəhadətnamənin əslini), hamısı eyni olmaq şərtilə yeni çəkilmiş

3x4 ölçüdə 4 fotoşəkil təqdim etməlidirlər.

Qarşısında ulduz (*) işarəsi olan xüsusi qabiliyyət imtahanı tələb edən ixtisasları seçən abituriyentlər avqustun 27-dən sentyabrın 3-dək seçdikləri ixtisasların aid olduğu texnikumlarda qabiliyyət imtahanında iştirak etməli, sentyabrın 5-dək qabiliyyət imtahanı verdiyi texnikumda ərizə forması doldurmalıdırlar.

Abituriyentlərə xüsusi qabiliyyət imtahanı tələb edən ixtisaslarla yanaşı, müvafiq qrup daxilində digər ixtisasların da kodlarını seçmək imkanı verilir.

Qabiliyyət imtahanının nəticələri “məqbul” və ya “qeyri-məqbul”la qiymətləndirilir.

Qabiliyyət imtahanından “qeyri-məqbul” alan abituriyentlər ərizələrində yalnız xüsusi qabiliyyət imtahanı tələb etməyən ixtisasları göstərə bilərlər.

İxtisaslar üzrə müsabiqə yalnız test imtahanında toplanılan ballar əsasında aparılır.

Orta ixtisas məktəblərinin “xarici dil” ixtisaslarını seçən abituriyentlər həmin texnikumlarda avqustun 27-dən sentyabrın 5–dək müvafiq xarici dil üzrə müsahibədən keçməlidirlər. Əks halda onların həmin ixtisasları nəzərə alınmır.

Bu il 50 dövlət və 4 qeyri-dövlət orta ixtisas məktəbinin 82 ixtisası üzrə 9 min 124 plan yeri ayrılmış, onlardan 3 min 734-ü qəbulun I mərhələsində dolmuşdur.

II mərhələyə 5 min 390 plan yeri qalmışdır. Onlardan 4 min 399 yer dövlət, 991 yer isə qeyri-dövlət orta ixtisas məktəblərindədir. Dövlət orta ixtisas məktəblərinin 2 min 650 plan yeri ödənişli əsaslarladır. Plan yerlərinin 3 min 195-i Azərbaycan, 289–u rus bölməsinin payına düşür, 1 min 906 yerə isə birgə müsabiqə keçiriləcəkdir.

Orta ixtisas məktəblərinin siyahısı, qəbul qaydaları, elanı, “Abituriyentin ərizəsi” formasının doldurulma qaydası, ixtisas kodları “Abituriyent” jurnalının 10-cu nömrəsində dərc olunmuşdur. Orta ixtisas məktəblərinə sənəd qəbulu ilə bağlı məlumatlarla TQDK-nın İnternet saytında tanış olmaq mümkündür. Sayt belədir: w.w.w.tqdk.gov.az