SİYASƏT
RUSİYA DİPLOMDAN SONRAKI HƏKİMLƏRİN TƏKMİLLƏŞDİRİLMƏSİ AKADEMİYASININ REKTORU AKADEMİK LARİSA MAŞETOVANIN ÇIXILŞI
Çox hörmətli sədarət!
Xanımlar və cənablar!
Hər şeydən əvvəl istərdim ki, konfransa dəvət olunduğum üçün Prezident Heydər Əliyevə öz minnətdarlığımı bildirim və ona cansağlığı arzulayım.
Zərifə xanım Əliyeva- tibb elmləri doktoru, professor, akademik. O, sözün həqiqi mənasında böyük alim, nüfuzlu müəllim, gözəl ana, nəcib qadın olmuşdur. Belə bir insan həqiqətən böyük hörmətə layiqdir.
Bu gün burada Zərifə xanım haqqında çoxlu xoş sözlər deyildi. Mən istərdim ki, öz şəxsi təəssüratlarımı sizinlə bölüşüm. Tale mənə də Zərifə Əziz qızı ilə ünsiyyət bağlamaq xoşbəxtliyi qismət etmişdir. Biz bir yerdə işləmişik. Mənim ilk monoqrafiyamın təşəbbüskarı möhtərəm Heydər Əliyev olub. O, bizə diplomdan sonrakı təhsil üçün oftalmologiya üzrə məruzələr silsiləsinin çap olunmasını tövsiyə etdi. Bu kitab Zərifə Əliyeva ilə birlikdə yazılmışdı. Beləliklə, diopeftik oftalmologiya kitabı işıq üzü gördü ki, bu da bir neçə kafedranın müştərək məhsulu idi. Bu kitab tibb nəşriyyatında xarici dillərdə də çap olundu və oftalmoloji kadrların hazırlanmasında çox böyük rol oynadı.
Mənim yaddaşımda başqa bir xatirə də yaşayır. Bu, Zərifə xanımın Moskva elmi oftalmologiya mərkəzinin iclasındakı çıxışı ilə bağlıdır. Yəqin bu zalda olanların çox az hissəsi həmin yığıncaqda iştirak edib. Bu, çox maraqlı bir çıxış idi. Əslində bu, müəllimin öz tələbələrinə müraciəti idi. O qədər ciddi, nüfuzedici bir çıxış idi ki, onu mən ömrüm boyu yadda saxladım və o vaxtkı qeydlərimdə də dəfələrlə ona müraciət etmişəm. Zərifə xanımın çox illər bundan qabaq dediyi sözlər o zaman onu dinləyənlərin hamısı üçün bir həyat tövsiyəsi olmalıdır. O, həyatı çox sevirdi və bu həyat üçün çox əhəmiyyətli işlər görmüşdü.
Zərifə xanım Rusiya və Azərbaycan oftalmoloqları arasında qırılmaz ünsiyyət körpüsü salmışdı. Oftalmoloqlar bir-biri ilə sıx dostluq və əməkdaşlıq edirdilər. Müştərək elmi əsərlər çap etdirirdilər. Bir-biri ilə xeyirxah münasibətdə olurdular. Biz bir-birimizi görəndə həmişə sevinirdik. Diplomdan sonrakı təhsil sistemi işləyir və buzim nazirliklərimiz arasında müvafiq sənəd imzalanıb və bundan sonra da bu əlaqələr inkişaf edəcəkdir. İki rektor- Azərbaycan Həkimləri Təkmilləşdirmə İnstitutunun rektoru və mən buna əminik.
Sonda mən təkcə oftalmoloqlara, tibb işçilərinə deyil, bütün Azərbaycan xalqına inkişaf və sülh arzulayıram.