Bakı, 27 noyabr, Elvira Məmmədova, AZƏRTAC

“RecExpo III” sərgisində 14 ölkədən 150-dən çox tikinti və investisiya layihəsi təqdim ediləcək.

AZƏRTAC xəbər verir ki, bu barədə “RecExpo III” – Azərbaycan Beynəlxalq Daşınmaz Əmlak və İnvestisiya sərgisi ilə bağlı noyabrın 27-də keçirilən mətbuat konfransında Əmlak Məsələləri Dövlət Komitəsinin (ƏMDK) şöbə müdiri Qulu Xəlilov məlumat verib.

O bildirib ki, noyabrın 28-dən 30-dək Bakı Ekspo Mərkəzində təşkil olunacaq sərgini ƏMDK, “Elan Expo” və “Atılım Fuarcılık” birgə keçirəcək. Sərgidə 14 ölkədən - Azərbaycan, Türkiyə, Birləşmiş Ərəb Əmirlikləri (BƏƏ), Qətər, Birləşmiş Krallıq, Portuqaliya, Fransa, İspaniya, Polşa, İtaliya, Rusiya, Andorra və Gürcüstandan 70-ə yaxın şirkət iştirak edəcək. Ötən ildən fərqli olaraq sərgidə daha çox investor, əmlak şirkətləri qatılacaq, eyni zamanda, onların tikinti və infrastruktur layihələri nümayiş etdiriləcək.

Qeyd edilib ki, sərginin əsas məqsədi Azərbaycanda daşınmaz əmlak bazarının daha da canlandırılması, bu sahəyə yatırılan yerli və xarici investisiyaların həcminin artırılmasıdır. Daşınmaz əmlak bazarı ilə bağlı investisiya mühitinin bu sahədə fəaliyyət göstərən xarici şirkətlərə nümayiş etdirilməsi və sərmayəçilərin ölkədə həyata keçirilən özəlləşdirilmə prosesinə cəlb edilməsi də əsas vəzifələrdəndir.

ƏMDK-nın strateji planlaşdırma, innovasiyalar, monitorinq və təhlil şöbəsinin müdiri Şamil Şirinov bildirib ki, Beynəlxalq Daşınmaz Əmlak və İnvestisiya Sərgisinin sahəsi 6 min 500 kvadratmetr təşkil edir. Sərgidə komitənin fəaliyyətini əks etdirən pavilyon yaradılıb. Pavilyon 90 kvadratmetrlik ərazini əhatə edir. Burada komitənin fəaliyyət istiqamətləri üzrə, o cümlədən daşınmaz əmlak və torpaq idarəçiliyində tətbiq edilən innovativ layihələr, elektron və onlayn xidmətlər, modern idarəetmə mexanizmləri barədə məlumatlar nümayiş olunacaq. Pavilyonda komitənin tətbiq etdiyi elektron xidmətlərə, daşınmaz əmlakın qeydiyyatına, özəlləşdirilmə prosesinə və torpaqların elektron kadastr uçotu işlərinə dair bölmələr də yer alacaq. Həmçinin sərgidə torpaqların elektron kadastr uçotu informasiya sistemin məlumatları əsasında hazırlanmış ölkənin 3D formatlı relyef xəritəsinin maketi quraşdırılacaq. Azərbaycan dünyada bu ölçüdə maket xəritəsi olan yeganə ölkədir.

Sərgidə quraşdırılmış elektron monitorlar vasitəsilə komitənin 36 elektron xidməti nümayişi ediləcək. Belə monitorlarda elektron xidmətlərdən istifadə etməklə bağlı prosedurlar əksini tapacaq. Eyni zamanda, monitorda innovativ yenilik olan Elektron hərrac, ondan istifadə qaydaları əks olunacaq.

Builki sərgidə özəlləşdirilməyə çıxarılan müəssisələrlə bağlı guşə də yaradılacaq. Guşədə həmin müəssisələrin maliyyə və iqtisadi göstəriciləri, istehsal etdikləri məhsul və xidmətlər, yerləşdiyi ünvan, fəaliyyət növü, gəlirgətirmə potensialı və digər məlumatlar əksini tapacaq. Potensial iştirakçılara özəlləşdirilməyə çıxarılan müəssisələr və özəlləşdirilmədə iştirak prosedurları barədə məlumat veriləcək.

Pavilyonda Azərbaycan Respublikasının maket relyef xəritəsi də nümayiş etdiriləcək. Maket xəritə üfüqi olaraq 1:100 000, şaquli olaraq isə 1:33 000 miqyasındadır. Xəritənin uzunluğu 6 metr, eni isə 4,5 metrdir. Həmin xəritə torpaqların elektron uçotu sisteminin məlumatları əsasında dəqiq koordinatlara istinad edilməklə hazırlanıb.

“Elan Expo” və “Atılım Fuarcılık” şirkətlərinin nümayəndələri Salim Şahin və İlkin Abdiyev bildiriblər ki, sərginin daşınmaz əmlak bazarına yatırılan investisiyanın artırılması baxımından xüsusi əhəmiyyəti var. Bura həm şirkətlər, həm də alıcılar üçün əlverişli platformadır. Sərginin ən cəlbedici cəhətlərindən biri də burada birbaşa potensial alıcılar üçün yaradılan seçim imkanlarının olmasıdır.

Sərgi çərçivəsində müxtəlif yerli və xarici tikinti şirkətləri tərəfindən endirim kampaniyaları nəzərdə tutulub. Eyni zamanda, ziyarətçilər Bakıda, o cümlədən Türkiyə, Gürcüstan və bir sıra Avropa ölkələrində əlverişli qiymətlərlə mənzil, ev və digər daşınmaz əmlak obyektlərini əldə etmək imkanlarından yararlana bilərlər.

Diqqətə çatdırılıb ki, sərgidə “Dreamland” şirkəti nağd ödənişlərdə 25 faiz endirimlə, “EMS” - 20 faiz endirim və 55 min ABŞ dollarından başlayan qiymətlərlə, “Teymuroğlu” yeni ilə qədər 20 faiz endirim və bütün mənzil alanlara ilk ödəmədən sonra faizsiz 36 ay kreditlə mənzil təklif edir. Bundan başqa, “Word Ersan Gayrımenku” tərəfindən bütün layihələrə 5 faiz endirim, “Alanya Porpertles” şirkəti tərəfindən 3 faiz endirim, “Cahan İnşaat” şirkəti tərəfindən isə 1 illik kredit yolu ilə ev alanlara sərgiyə özəl olaraq 15 faiz endirim təklif olunur. Bundan əlavə, “AS Grup-Renessans Place”dan sərgi dövründə dördotaqlı mənzil alana qaraj hədiyyə olunacaq. “Best Constructıon-Boulvard Residence” 24 ay faizsiz kredit və 25 il 8 faizli ipoteka ilə, “Erbatu” şirkəti isə - Kiprdə “Erbatu”dan bütün layihələrə 10 faiz endirimlə mənzil satışa çıxarır. Vurğulanıb ki, yerli şirkətin Bakıda inşa etdiyi binalarda da bir mənzil 20 faiz endirimlə ziyarətçilər arasında keçiriləcək uduşlu lotereyaya təqdim ediləcək.

Sərginin ikinci günündə “Daşınmaz əmlak, özəlləşdirmə və investisiyalar” mövzusunda beynəlxalq konfrans keçiriləcək. Konfransda Almaniya, Yunanıstan, Türkiyə, BƏƏ, Belarus, Birləşmiş Krallıq, Polşa, Macarıstan, Portuqaliya, İspaniya və digər ölkələrdən, eləcə də xarici dövlətlərin Azərbaycanda akkreditə olunmuş səfirliklərindən, beynəlxalq təşkilatlardan, yerli və xarici biznes qurumlarından, bələdiyyələr və mərkəzi icra hakimiyyəti orqanlarından 100-dən çox nümayəndənin iştirakı nəzərdə tutulur.

Qeyd olunub ki, sərgiyə ziyarətçilərin daşınması üçün xüsusi avtobuslar ayrılıb. Avtobuslar sərgi keçirilən müddətdə səhər saat 10-dan etibarən hər saatdan bir metronun “Nəriman Nərimanov” stansiyasının yaxınlığından (“Mcdonalds”la üzbəüz) Bakı Ekspo Mərkəzinə və əks istiqamətdə sərnişinlərin pulsuz daşınmasını həyata keçirəcək.