ELM VƏ TƏHSİL


Rektor Cəfər Cəfərov: Beynəlxalq Müəllimlər Günü bütün xalqların həyatına mühüm tarixi gün kimi daxil olub

Bakı, 5 oktyabr, AZƏRTAC

Azərbaycan Dövlət Pedaqoji Universitetində (ADPU) 5 oktyabr - Beynəlxalq Müəllimlər Gününə həsr edilmiş tədbir keçirilib.

AZƏRTAC xəbər verir ki, əvvəlcə tədbir iştirakçıları Fəxri xiyabana gələrək xalqımızın ümummilli lideri, müasir müstəqil dövlətimizin memarı və qurucusu Heydər Əliyevin xatirəsini yad edib, məzarı önünə əklil qoyub, gül dəstələri düzüblər.

Görkəmli oftalmoloq-alim, akademik Zərifə xanım Əliyevanın da xatirəsi anılıb, məzarı üzərinə tər güllər düzülüb.

Tədbir Azərbaycanın dövlət himninin səsləndirilməsi ilə başlayıb.

Rektor Cəfər Cəfərov tədbir iştirakçılarını Beynəlxalq Müəllimlər Günü münasibətilə təbrik edib və onlara uğurlar arzulayıb. Rektor bildirib ki, oktyabrın 5-i xalqımızın həyatında çox xoş və əlamətdar bir gündür. Beynəlxalq Müəllimlər Günü dünyanın bütün mədəni və mütərəqqi xalqlarının həyatına mühüm tarixi bir gün kimi daxil olub. BMT-nin ali mədəniyyət qurumu olan UNESCO tərəfindən 1966-cı il oktyabrın 5-də verilən qərar əsasında hər il Beynəlxalq Müəllimlər Günü dünyanın 100-dən çox ölkəsində, o cümlədən Azərbaycanda qeyd olunur.

C.Cəfərov Azərbaycanda müəllim peşəsinin ictimai nüfuzunun yüksəldilməsi üçün əməli tədbirlərin həyata keçirildiyini bildirib. Pedaqoji təhsilə marağın xeyli artdığını deyən rektor 500-dən yüksək bal toplayan 566 gəncin ali təhsil almaq üçün Pedaqoji Universiteti seçdiyini diqqətə çatdırıb. Qeyd olunub ki, yüksəkixtisaslı pedaqoji kadrlar hazırlanmalıdır. Bu sənəti seçənlər daim öz intellekt səviyyəsini artırmalı, vətənpərvərlik, milli-mənəvi dəyərlər, dövlətçiliyimizə sədaqət ruhunda tərbiyə olunmalıdırlar.

Təhsil nazirinin müavini, Bakı Şəhəri üzrə Təhsil İdarəsinin müdiri vəzifəsini icra edən Məhəbbət Vəliyeva Prezident İlham Əliyevin oktyabrın 4-də təhsil işçilərinə “Əməkdar müəllim” fəxri adının verilməsi və onların “Tərəqqi” medalı ilə təltif edilmələri ilə bağlı imzaladığı sərəncamların müəllim əməyinə verilən dəyərin əyani nümunəsi olduğunu diqqətə çatdırıb.

Nazir müavini bildirib ki, Təhsil Nazirliyinin həyata keçirdiyi genişmiqyaslı islahatların əsas məqsəd və hədəflərindən biri müasir əmək bazarının tələblərinə cavab verən yüksəkixtisaslı pedaqoji kadrların hazırlanması və cəmiyyətdə müəllim peşəsinin ictimai nüfuzunun artırılmasıdır.

Tədbir konsert proqramı ilə davam edib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.