MƏDƏNİYYƏT


Rənglərin qardaşlığı: İzmirdən Bakıya sənət körpüsü

Bakı, 19 oktyabr, AZƏRTAC

Oktyabrın 19-da Muzey Mərkəzində Türkiyə və Azərbaycan rəssamların əl işlərindən ibarət “Rənglərin qardaşlığı” adlı rəsm sərgisinin açılışı olub.

AZƏRTAC xəbər verir ki, Türkiyənin ölkəmizdəki səfirliyinin mədəniyyət və tanıtma müşavirliyi ilə Bakı Yunus Əmrə İnstitutu, İzmir Balçova bələdiyyəsi, Azərbaycan Qardaşlıq və İş Birliyi Dərnəyi və Azərbaycan Rəssamlar İttifaqının birgə təşkilatçılığı ilə reallaşan rəsm sərgisinin kuratoru azərbaycanlı rəssam Gunay Mehdizadədir.

Tədbirdə Milli Məclisin deputatı İlham Məmmədov, Bakı Yunus Əmrə İnstitutunun müdiri İbrahim Yıldırım, səfirliyin mədəniyyət və təbliğat müşaviri İrfan Çiftçi, Rəssamlar İttifaqının katibi, Xalq Rəssamı Ağaəli İbrahimov və başqaları çıxış edərək sərginin iki qardaş ölkə arasında mədəni sahədə əlaqələrin inkişafının bariz nümunəsi olduğunu vurğulayıblar.

Bildirilib ki, mədəni müstəvidə Türkiyə-Azərbaycan əməkdaşlığının daha da genişlənməsinə və dünyada baş verən qlobal təlatümlər fonunda iki qardaş ölkənin bir-birinə daha da bağlanmasına ehtiyac var. Bu baxımdan incəsənətin müxtəlif növlərində birgə layihələrin həyata keçirilməsi ilə xalqlarımızı daha da yaxınlaşdırmalıyıq.

Qeyd olunub ki, təbiətin və həyatın rənglərini, cizgilərini özündə birləşdirən rəsm sənəti üzərindən Türkiyə və Azərbaycan arasında bir körpü qurulması həm dərin məna, həm də tarixi əhəmiyyət daşıyan bir fəaliyyətdir. Ümummilli lider Heydər Əliyevin dediyi kimi, “Bir millət, iki dövlət” olan iki ölkə arasında “Rənglərin qardaşlığı” da əbədidir. Təbii ki, bu fikrin müxtəlif təşəbbüslərlə davamlı olaraq ifadə olunması, təkrarlanması zərurəti var. Mədəniyyət və incəsənətin müxtəlif növlərində yaradıcı təşəbbüslərin birgə reallaşması iki qardaş ölkənin içində yaşayan “bir millət” anlayışının daha da bütövləşməsi və zənginləşməsinə imkan verəcək.

Vurğulanıb ki, Bakı Yunus Əmrə İnstitutu ilə İzmir Balçova Bələdiyyəsinin başlatdığı və Azərbaycan Qardaşlıq və İşbirliyi Dərnəyinin dəstək verdiyi “Rənglərin qardaşlığı” adlı rəsm sərgisi çərçivəsində bu ilin may-iyun aylarında hər iki ölkədən, ümumilikdə 18 rəssam İzmirdə bir araya gəliblər.

Əminlik ifadə edilib ki, sərgi Azərbaycanın müstəqilliyini bərpa etməsindən sonra qardaşlaşan Bakı və İzmir arasında əlaqələri daha da möhkəmləndirəcək.

Sərgidə Azərbaycan rəssamlarından Günay Mehdizadə, Suğra Bağırzadə, Ədalət Əfəndi, Elmar Ağamirzə, Ələsgər Kazımov, Rüfət Əsgərov, Azər İslam, Mehriban Mehdizadə və Rəfixan Mövlanovun, Türkiyədən isə Faden Suzan Kudsioğlu, Mahmut Durmuş, Hatice Reyhan Abacıoğlu, Bedri Karayağmurlar, Hatice Aydoğan və Gündoğdu Uğraşın əl işləri nümayiş olunub.

Sərgi üç gün davam edəcək və oktyabrın 21-də başa çatacaq.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.