REGİONLAR


Repetitor yanına getmədən də yüksək bal toplamaq olar - kənd məktəblisinin uğur sirri VİDEO

Ağsu, 31 avqust, Rəşad Türkoğlu, AZƏRTAC

Ağsu rayon Musabəyli kənd sakini İsa Heydərov ali məktəbə qəbul imtahanlarında yüksək nəticə göstərən şagirdlərdən biridir.

AZƏRTAC xəbər verir ki, İsa bu il buraxılış imtahanında mümkün 300 baldan 276 bal toplayaraq rayon üzrə, 2-ci qrup blok imtahanında isə mümkün 400 baldan 397 bal toplayaraq respublika üzrə ən yüksək nəticə göstərib. Ümumi olaraq 673 balla ali məktəbə qəbul üçün ixtisas seçimi mərhələsinə buraxılıb.

İsa Heydərov hələ 9-cu sinifdə qatıldığı Respublika fənn olimpiadasında tarix fənnindən ölkə üzrə 1-ci, 10-cu sinifdə isə respublika üzrə 2-ci yerə layiq görülüb: “Mənim uğurumun təməli aşağı siniflərdə qoyulub. Yuxarı siniflərdə isə planlı və məqsədli şəkildə çalışmışam. Aşağı siniflərdən müxtəlif intellektual yarışmalarda nailiyyətlər əldə etmişəm. Bu, mənə böyük motivasiya verib. Müəyyən vaxtlarda, amma dediyim kimi, planlı çalışırdım”.

Maraqlısı budur ki, bir çox məktəblilərin hazırlıq kurslarına üz tutduğu dövrdə, İsa bu nəticələri repetitor hazırlığına getmədən məktəbdə bütün fənləri eyni dərəcədə mükəmməl öyrənməklə qazanıb.

Musabəyli kənd tam orta məktəbin direktoru Afaq Abdullayeva: “Bəzən valideynlərdə belə bir fikir formalaşır ki, repetitor yanına getmədən, hazırlıq keçmədən yüksək bal toplamaq olmaz. Həm də şəhərdəki məktəblərdə oxumalısan, yəni kənd məktəbində oxumaqla yüksək nəticə əldə etmək olmaz. Bu, heç də belə deyil. Mən nümunə olaraq öz şagirdlərimizi göstərə bilərəm. İsanın nailiyyəti bizim məktəbin üçüncü yüksək nəticəsidir ki, heç bir repetitor hazırlığı keçmədən öz əzmkarlığı, müəllimlərlə qarşılıqlı çalışması sayəsində bu cür uğur əldə etmişik”.

İsanın anası ilə söhbət zamanı oğlunun məktəb illərində intellektual yarışlarda, viktorinalarda çox iştirak etdiyini, hər dəfə də qalib gəldiyini söyləyir. “Buna görə də onun gələcəkdə daha yüksək nailiyyətlər qazanacağını bilirdik. Çünki aşağı siniflərdən İsanın nə qədər məsuliyyətli, əzmkar, çalışqan olduğunu görürdük. Belə bir deyim var, hər bir şagirdin arxasında güclü, eyni zamanda, məsuliyyətli valideyn durur. Mən həmişə onun dərslərini oxumasına ciddi fikir vermişəm. Bununla yanaşı, bu, təkcə valideyn uğuru deyil, məktəbin müəllimlərinin uğurlarıdır. İsa artıq İqtisad Universitetində Maliyyə ixtisasını seçib. Biz ona hər zaman dəstək olmuşuq. Bütün valideynlərə də bu sevinci arzu edirik”, - deyə İlahə xanım vurğulayıb.

Dağlıq Şirvan Regional Təhsil İdarəsinin Ağsu rayon təhsil sektorunun müdiri Əlmirzə Məmmədov bildirib ki, bu il Ağsu rayonunda 480 nəfər 11–ci sinfi bitirib. Onlardan 50 faizdən çoxu ali məktəbə sənəd verib: “Bu il ali məktəbə sənəd verən məzunlarımızın göstəriciləri ötənilkilərdən fərqli olmuşdur. Belə ki, ötən il yeddi şagirdimiz 500-dən yuxarı bal toplamışdı, 600-dən çox toplayan məzunumuz yox idi. Amma bu il 20-dən çox məzunumuz 500-dən, 3 nəfər isə 600-dən yuxarı bal toplayıb”.

Qeyd edək ki, Ağsu rayonu üzrə 68 məktəb fəaliyyət göstərir. Bu məktəblərdən 35-i tam orta, 16-sı ümumi orta, 17-si ibtidai məktəblərdir.

Xatırladaq ki, Ağsu rayonunun Musabəyli kənd tam orta məktəbi Heydər Əliyev Fondunun dəstəyi ilə tikilərək istifadəyə verilib. İkimərtəbəli binada 17 sinif otağı, biologiya və texnologiya otaqları, informatika kabineti, kitabxana, idman və akt zalları, yeməkxana və s. tədrisin yüksək səviyyədə təşkilinə imkan verir. Məktəbin həyətində açıq idman meydançası salınıb, istirahət köşkləri tikilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.