CƏMİYYƏT


Rəşad Mahmudov: Baş ağrısı, inyeksiya yerində şişkinlik və qızartı vaksinin yan deyil, birbaşa təsiridir

Bakı, 17 fevral, AZƏRTAC

Bir aydır ki, ölkəmizdə yeni növ koronavirus (COVID-19) infeksiyasına qarşı vaksinasiya aparılır. Peyvəndin birinci dozasını vurduranlar indi ikinci dozanı qəbul edirlər. Bu gündən isə 50 yaşdan yuxarı olanlar arasında vaksinasiyaya başlanılır.

AZƏRTAC xəbər verir ki, Milli Məclisin səhiyyə komitəsinin sədr müavini Rəşad Mahmudov bu barədə bəhs edərkən bildirib: “Nazirlər Kabineti yanında Operativ Qərargah 2021-2022-ci illər üçün COVID-19 xəstəliyinə qarşı vaksinasiya strategiyası hazırlayıb və peyvəndləmə mərhələli şəkildə həyata keçirilir və həmin proses Ümumdünya Səhiyyə Təşkilatının və bu sahə üzrə məşğul olan institutların tövsiyələri nəzərə alınaraq aparılır. Peyvəndləmənin ilk mərhələsi artıq arxada qalıb. Doğrudur, həmin prosesin kütləviliyi arzuolunan səviyyədə olmasa da, COVID-19-a qarşı yaradılmış mif qırıldı. Peyvənd vurulması zamanı nəinki həyati təhlükə yaradan, ümumiyyətlə heç bir ciddi hadisə qeydə alınmadı. Ölkəmizdə tətbiq olunan Çinin “Sinovac” şirkətinin istehsal etdiyi “CoronoVAC” peyvəndinin effektivliyi və ən əsası, zərərinin olmadığı aparılan tədqiqatlar nəticəsində sübut olunub və tibb aləmində məşhur “Lanset” jurnalının səhifələrində də təsdiq edilib. Vaksinlərə qarşı dünyada qabarıq şəkildə əks təbliğat gedir və hökumətlər də bunları nəzərə alaraq bu işi çox yüksək səviyyədə təşkil edirlər”.

Müsahibimiz daha sonra deyib: “İndiyədək ölkəmizdə peyvənd edilən 70-80 min nəfər arasında heç bir əks təsir müşahidə olunmayıb. Peyvənd edilənlər ikinci dozanı da qəbul etdikdən sonra xəstəliyə qarşı daha təhlükəsiz və daha qorxusuz olacaqlar. Lakin ölkə əhalisinin 1-2 faizinin peyvənd olunması ilə istənilən nəticəni əldə etmək olmaz. Operativ qərargahın qarşıya qoyduğu hədəf ölkə əhalisinin ən azı 70 faizinin həmin mərhələni keçməsidir. Yalnız bundan sonra preventiv tədbirlərə əməl etməklə dünya üçün qlobal bir bəla olan COVID-19-un təsiri altından çıxmağa nail olmaq mümkündür. Ona görə də güman edirəm ki, ikinci mərhələdə vaksinasiyaya daha çox inam yaratmağa nail olacağıq. Həmin inamı təbliğat deyil, peyvəndin nəticələri, onu vurduranların sağlamlıq vəziyyəti və təhlükəsiz həyatı yaradacaq. Baş ağrısı, inyeksiya yerində şişkinlik və qızartı vaksinin yan deyil, birbaşa təsiridir. Necə ki, qrip virusu bəzi hallarda assimptomatik, bəzi hallarda simptomatik keçir, COVID-19-a qarşı vurulan vaksin də eynən o cür fərqli təsirlərə malıkdır. Birinci inyeksiya zamanı həmin əlamətlərlə üzləşməyənlərdə ikinci inyeksiya zamanı həmin əlamətlər müşahidə oluna bilər. İnyeksiya yerində qızartı, lokal ağrılar, bir–iki gün davam edən qrip əlamətlərinin hiss olunması heç də mənfi göstərici deyil, əksinə, vaksinin faydalı olduğunu göstərən əlamətdir. Belə halların baş verməsi qətiyyən qorxulu deyil. Ən əsası odur ki, infeksiya ilə üzləşərkən ağciyər və digər orqanların ağır zədələnməsinə səbəb olan xəstəliyin qarşısı vaksinlərlə alınır və həmin təhlükədən uzun müddət qorunuruq. Vaksinasiya uşaqlardan başqa cəmiyyətin bütün təbəqələrinə tətbiq edilməklə yoluxmanın qarşısının alınması üçün deyil, yoluxma baş verdiyi halda belə xəstəliyi ağır keçirməyin və həyati təhlükə yaranmasının qarşısını alan ən sadə üsuldur”.

O, “Britaniya ştammı” ilə əlaqədar bunları qeyd edib: “Həmin mutasiya ilə barədə konkret bilgi olmasa da, tarixdən bilinən həqiqət ondan ibarətdir ki, eyni nəslin növü olduğuna görə vaksinin ona qarşı da təsir etmək ehtimalı çox yüksəkdir. Məncə, olmayan bir hadisənin stresini çəkmək əvəzinə mövcud qoruyucu vasitələrdən istifadə etməklə bu günə qədər istifadə edilən üsullarla sağlamlığı qorumaq və qayğısına qalmaq daha düzgündür. Hər kəs indiyədək istifadə edilən üsulları davam etməklə təhlükəsizliyini qorumalı və öz sağlamlığının qayğısına qalmalıdır. Vaksinasiyanın tətbiqinin müsbət nəticələrini isə yaxın zamanlarda görmək mümkün olacaq”.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.