Bakı, 7 noyabr, AZƏRTAC

Prezident İlham Əliyevin 2009-cu il noyabrın 17-də imzaladığı Sərəncamla hər il noyabrın 9-u ölkəmizdə Dövlət Bayrağı Günü kimi qeyd olunur. Bu, dövlətimizin başçısının böyük dəyər verdiyi Azərbaycan Xalq Cümhuriyyətinin tarixindən qaynaqlanır. Belə ki, Cümhuriyyətin üçrəngli Dövlət Bayrağı ilk dəfə 1918-ci il noyabrın 9-da Bakıda, hökumətin iclasında qəbul edilib və iclasın keçirildiyi Nazirlər Şurasının binası üzərində ucaldılaraq, 1920-ci ilin aprel ayınadək dövlət statusu daşıyıb.

Xatırladım ki, Xalq Cümhuriyyəti süquta uğradıqdan 70 il sonra üçrəngli bayrağımız 1990-cı il noyabrın 17-də Naxçıvan Muxtar Respublikası Ali Məclisinin sədri, xalqımızın ümummilli lideri Heydər Əliyevin təşəbbüsü və rəhbərliyi ilə keçirilən sessiyada muxtar respublikanın Dövlət Bayrağı kimi təsdiq edilib. Eyni zamanda, Ali Məclis Azərbaycan SSR Ali Soveti qarşısında üçrəngli bayrağın Azərbaycanın rəsmi dövlət rəmzi kimi tanınması haqqında vəsatət qaldırıb. Bununla əlaqədar Ali Sovet 1991-ci il fevral ayının 5-də həmin vəsatətə baxaraq, “Azərbaycan Respublikasının Dövlət Bayrağı haqqında” Qanunla onu yenidən Dövlət Bayrağı elan edib. Sonralar Ümummilli Lider bu barədə deyib: “Mən belə fikirdəyəm ki, Naxçıvan MR Ali Məclisinin qəbul etdiyi qərarlar Azərbaycan Respublikasının işinə çox təsir etdi və Azərbaycan rəhbərliyi bir neçə belə qərarın qəbul edilməsində məcburiyyət qarşısında qaldı. Naxçıvan Muxtar Respublikasının üzərində bu bayraq 1990-cı il noyabrın 17-də, Azərbaycan Respublikasında isə 1991-ci il fevralın 5-də dalğalandı”.

Onu da bildirim ki, 1991-ci il oktyabrın 18-də “Azərbaycan Respublikasının dövlət müstəqilliyi haqqında” Konstitusiya Aktı ilə Azərbaycan Respublikası Azərbaycan Xalq Cümhuriyyətinin varisi kimi onun dövlət rəmzlərini, o cümlədən Dövlət Bayrağını bərpa edib.

Bunu AZƏRTAC-a açıqlamasında Milli Məclisin deputatı, YAP-ın İdarə Heyətinin üzvü Rəşad Mahmudov söyləyib.

Deputat daha sonra deyib: “Ümummilli Liderimiz Azərbaycan Respublikasının müstəqilliyi bərpa edildikdən sonra Dövlət Bayrağımızın milli suverenliyin simvolu kimi ölkəmizin bütün vətəndaşları üçün müqəddəs dövlətçilik rəmzlərindən birinə çevrilməsində misilsiz fəaliyyət göstərdi. Dövlət Bayrağına hörmət və ehtiramın ən böyük nümunəsini ulu öndər Heydər Əliyevdən sonra Azərbaycan Respublikasının Prezidenti İlham Əliyev “Azərbaycan Xalq Cümhuriyyətinin yadigarı olan bu bayraq bizim azadlıq məfkurəsinə, milli– mənəvi dəyərlərə və ümumbəşəri ideallara sadiqliyimizi nümayiş etdirir”,- sözləri ilə təsdiqlədi.

Prezident İlham Əliyev Dövlət Bayrağımıza yüksək məhəbbətin təzahürü olaraq 2007-ci il noyabrın 17-də Bakıda Dövlət Bayrağı Meydanının yaradılması barədə, 2009-cu il noyabrın 17-də isə Dövlət Bayrağı Gününün təsis edilməsi haqqında sərəncamlar imzaladı və Dövlət Bayrağı Meydanının açılışında “Bizim bayrağımız qürur mənbəyimizdir. Bu bayraq bizim milli dəyərimizdir. Bu bayraq meydanının yaradılması Azərbaycanın gücünü, Azərbaycan xalqının öz dövlətinə sevgisini, dövlət rəmzlərimizə ehtiramımızı göstərir” deməsi ölkə rəhbərinin Ulu Öndərin ideyalarına sadiqliyinin bariz ifadəsi kimi diqqət çəkdi”.

Rəşad Mahmudov qeyd edib ki, xalqımızın Dövlət Bayrağına milli dəyər verməsi, böyük ehtiramla yanaşması Vətən müharibəsi getdiyi günlərdə də özünü qabarıq göstərdi. Dövlət Bayrağımız Azərbaycan vətəndaşlarının milli həmrəyliyinin, vahid məfkurə ətrafında sıx birləşməsinin başlıca amillərindən biri kimi bir daha təsdiqini tapdı. Savaş dövründə Silahlı Qüvvələrimizin ardıcıl qələbələri fonunda paytaxtımızda, eləcə də şəhər, kənd və qəsəbələrimizdə ucaldılan bayraqlarımız hamımızda qürur, fəxr hissi yaşatdı. Həmçinin Azərbaycan Ordusunun hər bir zabiti, hər bir əsgəri cəbhədə şəhər və kəndlərimizi yağı caynağından qurtarmaq, ilk olaraq bayrağımızı o yerlərə sancmaq üçün sinəsini güllə qabağına verdi, mərdliklə, qəhrəmanlıqla döyüşdü. Bununla da şanlı ordumuz ümummilli liderimizin “Kim Azərbaycanı sevirsə, kim Azərbaycanın müstəqil dövlət olmasını istəyirsə, kim Azərbaycanın işğal olunmuş torpaqlarının azad olunmasını istəyirsə, kim Azərbaycanın ərazi bütövlüyünü istəyirsə, o, bu bayraq altında birləşməlidir”, - dəyərinə sadiqliyini nümayiş etdirdi.

Xalqımız dahi şəxsiyyətin bayrağımıza verdiyi dəyəri heç vaxt unutmadı, Prezident İlham Əliyevin ətrafında sıx birləşdi, uzaqgörən siyasətini dəstəklədi və Böyük Zəfərə uzanan yolla inamla, qətiyyətlə irəliləyərək möhtəşəm uğurlara imza atdı. Bununla həm də dövlətimizin başçısının 2010-cu il sentyabrın 1-də Bakıda Dövlət Bayrağı Meydanının təntənəli açılış mərasimində dediyi “Bizim bayrağımız qürur mənbəyimizdir. Bizim bayrağımız canımızdır, ürəyimizdir. Bu gün Azərbaycanın hər bir yerində Dövlət Bayrağı dalğalanır. Azərbaycan ərazi bütövlüyünü bərpa edəndən sonra milli Dövlət Bayrağımız bu gün hələ də işğal altında olan torpaqlarda qaldırılacaqdır. Bizim bayrağımız Dağlıq Qarabağda, Xankəndidə, Şuşada dalğalanacaqdır. O günü biz hər an öz işimizlə yaxınlaşdırmalıyıq və yaxınlaşdırırıq. Eşq olsun, Azərbaycan bayrağına!”,-sözləri ilə onun müdrikliyinin, uzaqgörən siyasətinin şahidi oldu.

Bu gün ölkəmizdə Dövlət Bayrağı millətin varlığının, mövcudluğunun sübutu, müstəqil dövlətə sahib çıxmaq bacarığının əsas göstəricilərindən, ən müqəddəs rəmzlərindən biri kimi yüksək dəyərləndirilir. Respublikamızda özünütəsdiq simvolu olan bayrağı hər bir vətəndaşımız qürur və güvənc yeri sanır.