Rəşad Nəbiyev Bakı-Tbilisi-Qars layihəsi çərçivəsində Axalkələk stansiyasında görülmüş işlərlə tanış olub

Bakı, 4 aprel, AZƏRTAC

Rəqəmsal inkişaf və nəqliyyat naziri Rəşad Nəbiyev Gürcüstana işgüzar səfər edib.

Rəqəmsal İnkişaf və Nəqliyyat Nazirliyindən AZƏRTAC-a bildirilib ki, nazir səfər çərçivəsində Bakı-Tbilisi-Qars yeni dəmir yolu xətti layihəsi üzrə görülmüş işlərlə tanışlıq məqsədilə Axalkələk stansiyasında olub.

İcraçılar layihənin gedişi barədə ətraflı məlumat verib, sonra ərazidə infrastruktur obyektlərinə baxış keçirilib.

Qeyd edək ki, 2017-ci il oktyabrın 30-da açılışı olmuş Bakı-Tbilisi-Qars yeni dəmir yolu xətti üzrə yükdaşımaları artan dinamika ilə inkişaf edir. Bu günədək bu marşrutla 1 milyon tondan çox yük daşınıb.