DÜNYA


Rəsmi Pekin separatçı rejimə dəstəyə görə fransız senatorlara xəbərdarlıq edib

Pekin, 25 sentyabr, AZƏRTAC

Rəsmi Pekin Tayvan adasına planlaşdırılan səfərlə əlaqədar Fransa parlamentinin yuxarı palatası olan Senatın bir neçə üzvünə xəbərdarlıq edib.

AZƏRTAC xəbər verir ki, Çinin Parisdəki səfirliyi məsələ ilə əlaqədar bəyanat yayaraq, senatorları Fransa-Çin münasibətlərinə, habelə Fransanın reputasiyasına və maraqlarına zərər vurmamaq üçün Tayvana səfər etməzdən əvvəl dərindən düşünməyə çağırıb.

“Dünyada yalnız bir Çin var və Tayvan Çinin ayrılmaz hissəsidir. Çin Xalq Respublikası (ÇXR) hökuməti isə bütün Çini təmsil edən hüquqi hakimiyyətdir”, - deyə səfirliyin bəyanatında bildirilir.

Diplomatik nümayəndəliyin bəyanatında qeyd olunur ki, “Vahid Çin” siyasəti Çinin digər ölkələrlə diplomatik münasibətlərinin siyasi təməlini təşkil edir.

Tayvan ilə hər hansı rəsmi mübadilə aparmağın “Vahid Çin” siyasətinə hörmətsizlik olacağı vurğulanan bəyanatda deyilir ki, Senat Fransada vacib dövlət təsisatıdır, senatorların da rəsmi statusları var. Ona görə də dövlətin rəsmi siyasətinə uyğun hərəkət etməlidirlər. Senatorların Tayvana səfəri və orada hər hansı şəxslə görüşləri Fransanın da dəstəklədiyi “Vahid Çin” siyasətini ciddi şəkildə pozacaq və bu səfər “Tayvanın müstəqilliyi”nə can atan separatçı qüvvələr tərəfindən sui-istifadə olunacaq.

Rəsmi Pekin ümid edir ki, senatorlar qeyd olunan məqamları nəzərə alaraq səfər etməzdən əvvəl dərindən düşünəcəklər.

Qeyd edək ki, İkinci Dünya müharibəsindən sonra Çində Mao Cedonun rəhbərlik etdiyi kommunistlər Çan Kayşinin liderliyindəki Koumintan qüvvələrinə qalib gələrək Çin Xalq Respublikasının yaradıldığını elan ediblər. “Vahid Çin” prinsipinə əsaslanan ÇXR Tayvandakı qondarma “Çin Respublikası”nın mövcudluğunu qəbul etmir və adanın Çin Xalq Respublikasının tərkib hissəsi olduğunu bildirir.

Xaricdən Tayvan məsələsinə müdaxilənin qəbuledilməz olduğunu bəyan edən rəsmi Pekin ÇXR ilə diplomatik əlaqələri olan ölkələrin Tayvan ilə istənilən formada rəsmi təmasına qəti etiraz edir.

Senatorların Tayvana planlaşdırılan səfəri, əslində, Fransa parlamentarilərinin, müxtəlif ictimai-siyasi şəxslərin, bələdiyyə üzvlərinin, qeyri-hökumət qurumlarının dünyada separatçı rejimlərə dəstəyinin növbəti təzahürüdür. Fransa Milli Assambleyasının bəzi üzvləri və yuxarıda qeyd olunan kateqoriyadan olan şəxslər bir neçə dəfə həm işğal dövründə, həm də İkinci Qarabağ müharibəsindən sonra Xankəndiyə qanunsuz səfər edərək, separatçılara dəstək veriblər. Azərbaycan qanunvericiliyini pozduğu üçün həmin şəxslərin adı ölkəmizə girişi qadağan olunan xarici ölkə vətəndaşlarının siyahısındadır. Rəsmi Bakı Fransa parlamentarilərinin və digər şəxslərin Azərbaycan ərazilərinə qanunsuz səfərlərinin bölgədə hazırda mövcud olan münaqişə sonrası sülh quruculuğu səylərinə xələl gətirdiyini dəfələrlə qarşı tərəfin diqqətinə çatdırıb.

Şahin Cəfərov

AZƏRTAC-ın xüsusi müxbiri

Pekin

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.