İQTİSADİYYAT


Respublika Günü münasibətilə iqtisadiyönümlü vebinar keçirilib

Bern, 30 may, AZƏRTAC

Azərbaycan Respublikasının İsveçrədəki səfirliyinin təşkilatçılığı və İsveçrə-MDB Birgə Ticarət Palatasının dəstəyi ilə Azərbaycan Demokratik Respublikasının yaradılmasına həsr olunan vebinar təşkil edilib.

Ölkəmizin İsveçrədəki səfirliyindən AZƏRTAC-a bildiriblər ki, tədbirin keçirilməsində əsas məqsədlərdən biri də Azərbaycanın əlverişli iqtisadi mühiti barədə məlumat vermək və bu istiqamətdə İsveçrə biznes mühitinin ölkəmizlə əməkdaşlığa cəlb edilməsi olub.

Tədbirdə əvvəlcə Azərbaycanın Respublikasının və İsveçrə Konfederasiyasının dövlət himnləri səsləndirilib.

Sonra ölkəmizin İsveçrədəki səfiri Xanım İbrahimova Azərbaycan Xalq Cümhuriyyəti barədə qonaqlara məlumat verərək, 102 il öncə - 1918-ci ildə müsəlman Şərqində ilk demokratik və dünyəvi respublikanın məhz Azərbaycanda qurulmasını tədbir iştirakçılarının diqqətinə çatdırıb. X.İbrahimova bildirib ki, Cümhuriyyətin 23 ay yaşamasına baxmayaraq, siyasi, iqtisadi və sosial sahələrdə ciddi nailiyyətlər əldə edilib, qadınlara səsvermə hüququ verilməsi daxil olmaqla 200-ə yaxın qanun qəbul edilib. Azərbaycan-İsveçrə əlaqələrinin də məhz həmin dövrə təsadüf etdiyini vurğulayan səfir azərbaycanlı mütəfəkkirlərin Qafqaz Konfederasiyası yaratmaq ideyasının arxasında İsveçrə modelinin nəzərdə tutulduğunu qonaqların diqqətinə çatdırıb. O qeyd edib ki, çox qısa müddət mövcud olmasına baxmayaraq Cümhuriyyət Azərbaycanda dövlətçilik ənənəsinin əsasını qoyub.

Səfir X.İbrahimova Azərbaycan xalqının yalnız 70 il sonra - 1991-ci ildə yenidən müstəqilliyini bərpa etdiyini qonaqların diqqətinə çatdıraraq, müstəqilliyinin ilk illərinin Azərbaycan üçün çox çətin olduğunu, Ermənistanın Azərbaycana qarşı hərbi təcavüzünün vəziyyəti daha da ağırlaşdırdığını qeyd edərək, Ermənistan-Azərbaycan Dağlıq Qarabağ münaqişəsi nəticəsində Azərbaycanın beynəlxalq səviyyədə tanınmış ərazilərinin 1/5-nin işğal edildiyini və ölkəmizdə 1 milyon insanın qaçqın və məcburi köçkün kimi yaşamağa məcbur olduğunu bildirib. 1993-cü ildə ümummilli liderimiz Heydər Əliyevin hakimiyyətə gəlməsi ilə siyasi, iqtisadi və sosial istiqamətlərdə həyata keçirilən islahatlar nəticəsində önəmli xarici investisiyaların cəlb edildiyini və bununla da Azərbaycanın inkişaf etməyə başladığını vurğulayan səfir X.İbrahimova H.Əliyev siyasi kursunun layiqli davamçısı Prezident İlham Əliyev tərəfindən aparılan məqsədyönlü siyasət nəticəsində ölkəmizin donor dövlətə çevrildiyini, beynəlxalq təşkilatlarla, Ermənistan istisna olmaqla bir çox dövlətlərlə etibarlı ikitərəfli və çoxtərəfli əlaqələrin mövcudluğunu, habelə bir çox qlobal proseslərdə aktiv iştirakını qonaqların diqqətinə çatdırıb.

Ermənistan-Azərbaycan Dağlıq Qarabağ münaqişəsinə xüsusi vurğu edən səfir BMT və digər regional və beynəlxalq təşkilatların münaqişəyə dair qəbul etdiyi qətnamələr və sənədlər barədə məlumat verib və Ermənistanın təcavüzkar siyasətinin heç bir dövlət tərəfindən dəstəklənmədiyini qeyd edərək münaqişənin sülh yolu ilə həlli üçün dövlətimizi tərəfindən işlərin davam etdirildiyini bildirib və bu xüsusda, ölkəmizin ərazi bütövlüyünü və suverenliyini dəstəkləyən İsveçrə hökumətinə təşəkkürünü ifadə edib.

Azərbaycan-İsveçrə əməkdaşlığından söz açan səfir X.İbrahimova əlaqələrin görülən işlər nəticəsində son ildə daha da inkişaf etdiyini bildirib. Bu baxımdan, artıq ənənə halını almış iki ölkə prezidentlərinin Dünya İqtisadi Forumu çərçivəsində görüşlərinin ölkələrimiz arasında münasibətlərdə məxsusi rolunun olması vurğulanıb. Səfir bildirib ki, dördüncü sənaye inqilabının səbəb olduğu çağırış və imkanların həyata keçirilməsi məqsədilə bu il Prezident İlham Əliyev və Dünya İqtisadi Forumunun prezidenti Borge Brende arasında Dünya İqtisadi Forumunun ölkəmizdə afilə edilmiş regional mərkəzinin yaradılması ilə bağlı niyyət protokolu imzalanıb.

Prezident İlham Əliyevin apardığı müdrik siyasət nəticəsində ölkəmizin siyasi sabitliyə və sürətli iqtisadi inkişafa nail olduğunu söyləyən X.İbrahimova ölkəmizin bir çox dövlətlər, o cümlədən İsveçrə üçün etibarlı tərəfdaş kimi çıxış etdiyini bildirib. O qeyd edib ki, hazırda Azərbaycanda xidmət, tikinti, nəqliyyat, bank, sığorta və s. bu kimi qeyri-neft sektorunda İsveçrə şirkətlərinin xüsusi rolu var və bu xüsusda, İsveçrəyə məxsus “Holcim” Azərbaycanın qeyri-neft sektorunda ən böyük investisiyalar yatıran şirkətlərdən biridir. Eləcə də Azərbaycanın SOCAR şirkətinin İsveçrədə 200-ə yaxın yanacaq doldurma məntəqələrinin fəaliyyət göstərdiyini qonaqların diqqətinə çatdıran səfir ölkəmizdə İsveçrə ilə iqtisadi əlaqələrə böyük önəm verdiyini vurğulayıb. Daha sonra bildirib ki, səfirlik tərəfindən həm Azərbaycana, həm də İsveçrəyə təşkil edilən ixrac missiyaları, habelə Sürix və Cenevrə şəhərlərində həyata keçirilən “Bir kəmər, bir yol” investisiya forumları nəticəsində son bir il ərzində iki ölkə arasında iqtisadi dövriyyə nəzərə çarpacaq dərəcədə artıb.

Koronavirus pandemiyasından da bəhs edən səfir X.İbrahimova vurğulayıb ki, Prezident İlham Əliyev və birinci xanım Mehriban Əliyeva tərəfindən görülən işlər nəticəsində Azərbaycan nəinki milli səviyyədə, eyni zamanda, regional və qlobal səviyyədə koronavirus pandemiyası ilə mübarizədə ciddi addımlar atıb. Ölkəmiz tərəfindən Ümumdünya Səhiyyə Təşkilatına 10 milyon ABŞ dolları məbləğində, eləcə də bu pandemiyadan ən çox əziyyət çəkən bir sıra dövlətlərə maddi yardım edilib. Azərbaycanın bir çox ölkələri birləşdirən Şimal-Qərb, Şərq-Qərb və Şimal-Cənub nəqliyyat dəhlizlərinin yaradılmasında vacib rol oynadığını bildirən səfir pandemiya dövründə ölkəmizin fasiləsiz tranzit trafikinin təmin edilməsində mühüm rolunu nəzərə çatdırıb.

Sonra İsveçrənin Azərbaycandakı səfiri xanım Muriel Peneveyre çıxış edib. O, ölkəsinin Azərbaycanla əlaqələrə önəm verdiyini qeyd edib və iqtisadi əlaqələrin genişlənməsi fonunda Azərbaycanda makro iqtisadi sabitliyin qorunması istiqamətində maraqlı olduqlarını ifadə edib.

Natiqlərdən “SOCAR Energy” şirkətinin icraçı direktoru Edqar Baxman və “Stadler” şirkətinin idarəetmə üzrə direktoru Matias Stöhr çıxışlarında Azərbaycanın uğurlarından bəhs ediblər və ölkəmizin aidiyyəti qurumları ilə həyata keçirilən birgə layihələr barədə təbliğat xarakterli məlumat veriblər.

Tədbir Azərbaycana həsr edilən videoçarxla yekunlaşıb.

Vebinarda Federal Xarici İşlər Nazirliyinin və İqtisadi Məsələlər üzrə Dövlət Katibliyinin nümayəndələri və Turizm Nazirliyinin rəhbərliyi, İsveçrədə akkreditə olunmuş xarici ölkələrin səfirləri, eyni zamanda, yəhudi icmasının fəal rəhbərləri, İsveçrə biznes dairələrinin nümayəndələri, habelə Azərbaycan diasporunun üzvləri iştirak ediblər.

Elgün Niftəli

AZƏRTAC-ın xüsusi müxbiri

Bern 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.