Kuala Lumpur, 18 iyun, AZƏRTAC

Kuala Lumpurda Azərbaycanın Malayziyadakı səfirliyi tərəfindən 28 May - Respublika Günü və Azərbaycan Respublikası diplomatik xidmət orqanlarının 100 illik yubileyi münasibətilə rəsmi qəbul təşkil edilib.

AZƏRTAC xəbər verir ki, tədbirdə Malayziyanın Xarici İşlər Nazirliyinin rəsmiləri, Azərbaycan-Malayziya parlamentlərarası dostluq qrupunun üzvləri, Selanqor ştatının şahzadəsi Sulaiman Şah ibni Sultan Abdul Aziz Şah, “Petronas” dövlət neft və qaz şirkətinin prezidenti Van Zulkifli Van Ariffin, bu ölkədə akkreditə olunmuş diplomatik korpusun təmsilçiləri, ictimaiyyətin və kütləvi informasiya vasitələrinin nümayəndələri, tanınmış iş adamı Ko Ko Latt və soydaşlarımız iştirak ediblər.

Rəsmi qəbul hər iki ölkənin dövlət himnlərinin səslənməsi ilə başlayıb.

Tədbirdə çıxış edən səfir Qaley Allahverdiyev 2019-cu ildə Azərbaycan diplomatik xidmət orqanlarının 100 illik yubileyinin qeyd edildiyini və bunun Azərbaycan tarixində mühüm hadisə olduğunu bildirib. Azərbaycan Prezidentinin 2007-ci il 24 avqust tarixli Sərəncamı ilə 9 iyul tarixinin Azərbaycan diplomatik xidmət orqanları əməkdaşlarının peşə bayramı günü elan edildiyi, məhz bu tarixin seçilməsində 9 iyul 1919-cu ildə Azərbaycan Xalq Cümhuriyyəti (AXC) Xarici İşlər Nazirliyinin katibliyinə dair müvəqqəti təlimatın qəbul edilməsinin əsas götürüldüyü diqqətə çatdırılıb.

Azərbaycan diplomatiyasının zəngin tarixə malik olduğunu vurğulayan Q.Allahverdiyev orta əsrlərdə Azərbaycan dövlətlərinin Avropa və Asiya dövlətləri ilə geniş diplomatik münasibətlər qurduğunu, Ağqoyunlu dövlətinin hökmdarı Uzun Həsənin anası Sara Xatunun müsəlman dünyasında ilk qadın diplomat olduğunu qeyd edib.

Cümhuriyyətin uğurlu xarici siyasətindən danışan səfir həmin dövrdə bir çox ölkələrlə diplomatik münasibətlərin qurulduğunu, Azərbaycanda 16 dövlətin diplomatik nümayəndəliklərinin fəaliyyət göstərdiyini, bir sıra ölkələrdə diplomatik nümayəndəliklərin təsis edildiyini, 11 yanvar 1920-ci ildə Azərbaycan Xalq Cümhuriyyətinin Paris Sülh Konfransının Ali Şurası tərəfindən de-fakto tanındığını bildirib.

1991-ci ildə dövlət müstəqilliyini bərpa edən Azərbaycanın milli mənafelərimizin qorunmasına xidmət edən müstəqil, çoxşaxəli, tarazlaşdırılmış və fəal xarici siyasət həyata keçirdiyi, bütün dövlətlər və beynəlxalq təşkilatlarla bərabərhüquqlu və qarşılıqlı faydalı münasibətlər qurmaq əzmində olduğu, beynəlxalq hüququn norma və prinsiplərinə tam sadiq qaldığı qeyd edilib.

Q.Allahverdiyev müstəqil Azərbaycanın xarici siyasətdə böyük uğurlar əldə etdiyini, beynəlxalq münasibətlər sistemində rolunun davamlı olaraq gücləndiyini vurğulayaraq, ölkəmizin regional əməkdaşlığı təşviq edən irimiqyaslı layihələrdə iştirakından bəhs edib.

2019-cu ilin oktyabr ayında Azərbaycanın Qoşulmama Hərəkatına üzv ölkələrin dövlət və hökumət başçılarının 18-ci Zirvə görüşünə ev sahibliyi edəcəyi qeyd olunaraq, toplantıda üzv ölkələrin, o cümlədən Malayziyanın ən yüksək səviyyədə təmsil olunacağına ümid ifadə edilib.

Ermənistanın Azərbaycana qarşı hərbi təcavüzünün nəticələrinin aradan qaldırılmasının və beynəlxalq səviyyədə tanınmış sərhədləri çərçivəsində ölkəmizin suverenliyi və ərazi bütövlüyünün bərpasının xarici siyasətimizin prioritetlərindən olduğu vurğulanıb.

Azərbaycan-Malayziya münasibətlərindən danışan səfir Malayziya ilə dostluq, qarşılıqlı anlaşma və etimad şəraitində sıx dialoq və əməkdaşlığın ölkəmiz üçün mühüm əhəmiyyət kəsb etdiyini diqqətə çatdırıb. 2018-ci ildə Azərbaycan ilə Malayziya arasında diplomatik münasibətlərin qurulmasının 25 illiyinin tamam olduğu qeyd edilərək, keçən müddətdə iki ölkə arasında dostluq münasibətlərinin daha da gücləndiyi, qarşılıqlı maraq doğuran sahələrdə əməkdaşlığın əhəmiyyətli dərəcədə inkişaf etdiyi bildirilib. 2014-cü ildə Azərbaycan Respublikası ilə Malayziya arasında dostluq münasibətləri və tərəfdaşlıq haqqında Birgə Bəyannamənin imzalandığı, Azərbaycan hökumətinin Malayziyanın Ermənistan-Azərbaycan Dağlıq Qarabağ münaqişəsi ilə bağlı mövqeyini yüksək qiymətləndirdiyi vurğulanıb. Azərbaycan-Malayziya parlamentlərarası əlaqələrinin hazırkı səviyyəsindən məmnunluq ifadə edilib. Enerji sektorunda, Azərbaycanın ilk telekommunikasiya peykinin orbitə buraxılmasında sıx ikitərəfli əməkdaşlıq barədə danışılıb, iki ölkə arasında əlaqələrin daha da genişləndirilməsi üçün böyük imkanların olduğu qeyd edilib.

Tədbirdə əsas qonaq Malayziyanın Plantasiya Sənayesi və Əmtəə nazirinin müavini Şamsul İskandar bin Haci Mohd Akin çıxış edərək bayram münasibətilə təbriklərini çatdırıb, Azərbaycan Prezidenti İlham Əliyevə möhkəm cansağlığı və rifah, Azərbaycan hökumətinə və xalqına müvəffəqiyyətlər arzulayıb.

Rəsmi qəbulda Naxçıvan Dövlət Filarmoniyasının Mahnı və Rəqs Ansamblının rəqs qrupunun təqdim etdiyi milli rəqslərimizin də daxil edildiyi konsert proqramı böyük maraqla qarşılanıb.

Tədbirdə, həmçinin müasir Azərbaycanın inkişafından və nailiyyətlərindən bəhs edən videoçarxlar nümayiş etdirilib, milli mətbəximizin ləziz təamları təqdim edilib.

Tədbirin keçirildiyi zalın foyesində Azərbaycan diplomatiyasının tarixi və nailiyyətlərini əks etdirən stendlərdən, eləcə də Azərbaycan xalqının zəngin tarixi və mədəni irsini, ölkəmizin inkişafını və gözəl təbiətini nümayiş etdirən fotoşəkillərdən ibarət sərgi təşkil olunub.

“İrs” jurnalının Azərbaycan diplomatik xidmət orqanlarının 100 illik yubileyinə həsr olunan xüsusi buraxılışı və digər nəşrlər qonaqlara hədiyyə edilib.

Vüqar Ağayev

AZƏRTAC-ın xüsusi müxbiri

Kuala Lumpur