İQTİSADİYYAT


Rövnəq Abdullayev: Gürcüstanda yaşayan soydaşlarımızın sosial rifahının yüksəldilməsi əsas vəzifələrdən biridir

Tbilisi, 18 sentyabr, AZƏRTAC

SOCAR Gürcüstanda biznes fəaliyyətinin inkişafı ilə yanaşı, Azərbaycan Prezidenti İlham Əliyevin göstərişi ilə bu ölkədə yaşayan soydaşlarımızın sosial şəraitinin yaxşılaşdırılması məqsədilə də bir sıra layihələr həyata keçirir.

AZƏRTAC xəbər verir ki, bunu Gürcüstanda səfərdə olan SOCAR-ın prezidenti Rövnəq Abdullayev jurnalistlərə açıqlamasında bildirib.

Onun sözlərinə görə, şirkətin təqaüdü əsasında minlərlə soydaşımız Gürcüstanın ali məktəblərində dövlət dilində təhsil alıb və bu proqram gürcüdilli azərbaycanlı kadrların yetişdirilməsində böyük rol oynayıb.

R.Abdullayev hazırda bu proqram çərçivəsində 1200-ə yaxın azərbaycanlı tələbənin ali təhsil aldığını qeyd edib.

O bildirib ki, Gürcüstanda yaşayan azərbaycanlıların sosial rifahının yüksəldilməsi ölkə rəhbərliyi tərəfindən SOCAR şirkəti qarşısında qoyulan əsas vəzifələrdən biridir.

“Gürcüstan hökuməti də azərbaycanlıların sıx yaşadığı bölgələrin inkişafına böyük diqqət ayırır, həmçinin SOCAR-ın layihələrini dəstəkləyir və reallaşdırılması üçün şərait yaradır", – deyə, R.Abdullayev vurğulayıb.

Qeyd edək ki, sentyabrın 18-də SOCAR-ın dəstəyi ilə Marneuli rayonunun İlmazlı kəndinə təbii qazın verilməsi mərasimi, Qızılhacılı kəndində inşa olunan idman kompleksinin və Laqodexi rayonunun Qabal kəndidə tikilən uşaq bağçasının açılışı olub.

Hər iki sosial obyekt şirkət tərəfindən Gürcüstan hökumətinə təmənnasız təqdim olunub.

Xətayi Əzizov

AZƏRTAC-ın xüsusi müxbiri

Tbilisi

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.