Bakı, 7 may, AZƏRTAC

Son illərdə atmosferə atılan ümumilikdə 4,5 milyard kubmetrə qədər səmt qazı platformalarda tutularaq ölkənin qaz təsərrüfatına verilib.

AZƏRTAC xəbər verir ki, bu sözləri SOCAR-ın prezidenti Rövnəq Abdullayev mayın 7-də şirkətdə keçirilən Dünya Bankının “Səmt Qazının Yandırılmasının Azaldılması üzrə Qlobal Tərəfdaşlıq” (GGFR) Təşkilatının Rəhbər Komitəsinin iclasında deyib.

O bildirib ki, SOCAR, BP və Dünya Bankının “Səmt Qazının Yandırılmasının Azaldılması üzrə Qlobal Tərəfdaşlıq” Təşkilatının birgə layihəsi nəticəsində son illərdə atmosferə atılan ümumilikdə 4,5 milyard kubmetrə qədər səmt qazı platformlarda tutularaq ölkənin qaz təsərrüfatına verilib.

“Bu gün bəşəriyyət bir neçə qlobal xarakterli problemlə üzləşib ki, bunlardan biri də ətraf mühitin qorunmasıdır. Ekoloji problemlər bir ölkənin sərhədləri ilə məhdudlaşmır, bütün yer kürəsini əhatə edir. Bu səbəbdən SOCAR bu istiqamətdə əsas çalışmaları məhz beynəlxalq təşkilatlarla birgə həyata keçirir. Səmt qazının yandırılmasının azaldılması ətraf mühitin qorunmasına töhfə verməklə yanaşı, həm də bu dəyərli resursu ölkə iqtisadiyyatına qazandırır, iqtisadi dayanıqlığa xidmət edir”, - deyə R.Abdullayev əlavə edib.

Azərbaycanın ekologiya və təbii sərvətlər naziri Muxtar Babayev isə qeyd edib ki, Azərbaycan atmosferə qaz atılmalarının azaldılması sahəsində mühüm uğurlar əldə edib. Ölkədə bu proses artıq 10 ildən çoxdur ki aparılır. SOCAR Azərbaycanda həmin təşəbbüsün həyata keçirilməsində ən aparıcı şirkətdir və bu sahədə mühüm işlər görüb, uğurlar əldə olunub.

“Dünya Bankı Azərbaycanın əldə etdiyi nəticələri hər zaman yüksək qiymətləndirib. Bu sahədə işlər davam etdirilməlidir və atmosferə atılmaların həcmi hər il azalmalıdır. Çünki bizim 2030-cu ilə qədər proqnozlarımız var və həmin tarixə kimi atmosferə atılmaların əhəmiyyətli dərəcədə azaldılması nəzərdə tutulur”, - deyə nazir qeyd edib.

Dünya Bankının Azərbaycan üzrə ölkə direktoru Navid Hasan Naqvi deyib ki, hazırda 75-dən çox hökumət, neft şirkəti və inkişaf institutları 2030-cu ilədək səmt qazının yandırılmasının sıfıra endirilməsi təşəbbüsünə qoşulub: “Azərbaycan və SOCAR-la artıq 10 ildir ki, karbon emissiyasının azaldılması istiqamətində səmərəli əməkdaşlıq edirik. Hesab edirəm ki, SOCAR-ın bu sahədə uğurlu təcrübəsi dünyamızın üzləşdiyi qlobal ekoloji problemin aradan qaldırılmasına mühüm töhfədir və bütün neft və qaz şirkətləri üçün nümunə ola bilər”.

Dünya Bankı 2002-ci ildə bir sıra hökumət və şirkətlərlə birlikdə qlobal səmt qazı yandırılmasının azaldılması üzrə tərəfdaşlığa start verib. GGFR və Dünya Bankının səylərinin əsas məqsədi qaz ehtiyatlarını ölkələrin davamlı inkişafına və iqtisadiyyatlarının şaxələndirilməsinə yönləndirməkdir. Hər il dünyanın neft hasil olunan yerlərində 150 milyard kubmetr səmt qazı yandırılır. Bu, atmosferə 300 milyon tondan çox CO2 qazının emissiyasına səbəb olur. Əgər qlobal miqyasda yandırılan bütün qaz elektrik enerjisi istehsalına sərf olunsaydı, 750 milyard kilovat elektrik enerjisi yaranardı ki, bu da Afrika qitəsinin bir illik tələbatına bərabərdir.

SOCAR-ın ekologiya üzrə vitse-prezidenti Rəfiqə Hüseynzadə deyib ki, şirkət 2012-ci ildən 3 böyük layihə həyata keçirir. “Neft Daşları” neft və qazçıxarma idarəsindən (NQÇİ) il ərzində 250-280 milyon kubmetr, “28 May” NQÇİ-dən illik 300-310 milyon kubmetr, “Çıraq” platformasından isə ildə 330-350 milyon kubmetr səmt qazı yığılaraq əhaliyə verilib.

“Ümumiyyətlə, dünya praktikasında qəbul olunmuş şamda yandırılma əmsalı 5 faiz olduğu halda bu göstərici SOCAR-da 2014-cü ildə 2 faiz, 2016-cı ildə 1,74 faiz və 2017-ci ilin avqust ayında isə 1 faiz olub. Əldə olunmuş nəticə GGFR ilə səmərəli əməkdaşlığın nəticəsi olaraq qeyd edilməlidir. Əminəm ki, SOCAR bu sürətlə davam edərsə, dünya ölkələri arasında 2030-cu ilə qədər qoyulan tələblərə çatan ilk şirkət olacaq”, - deyə şirkətin vitse-prezidenti bildirib.

R.Hüseynzadə qeyd edib ki, SOCAR 2015-ci ildən BMT-nin İnkişaf Proqramı ilə birgə “Azərbaycanın yanacaq istehlakı sektorunda karbon emissiyalarının azaldılmasını təmin edən Milli Fəaliyyət Planı” (NAMA) layihəsini icra etməkdədir. Layihə ümumilikdə 3 komponentdən ibarətdir və bu komponentlərdən biri də quyulardan səmt qazının yığılması və istifadəçilərə verilməsidir. Layihə çərçivəsində “Siyəzənneft” NQÇİ-nin ərazisində 63 quyudan il ərzində 7 milyon kubmetr səmt qazının yığılaraq əhaliyə ötürülməsi nəzərdə tutulur.

GGFR Təşkilatının rəhbəri Kristofer Qilbert isə Bakıda keçirilən toplantının SOCAR ilə təşkilat arasında qlobal istiləşmə və iqlim dəyişmələrinin təsirinin azaldılması istiqamətində həyata keçirilən əməkdaşlığın 10-cu ildönümünə təsadüf etdiyini deyib.

Qeyd edək ki, GGFR Təşkilatının illik toplantısı bu il SOCAR-ın təşəbbüsü ilə ilk dəfə olaraq Azərbaycanda keçirilir. Mayın 7-8-də keçiriləcək tədbir zamanı şamda yandırılan qazın azaldılması istiqamətində Azərbaycanın təcrübəsinin öyrənilməsi, əldə olunan yüksək nailiyyətlərlə yaxından tanışlıq və bu təcrübənin xaricdə tətbiqi məsələlərinin mümkünlüyünün müzakirəsi məqsədilə SOCAR-ın istehsalat ərazilərinə səfər təşkil olunacaq. Tədbirin işində dünyanın 18 ölkəsindən və 13 beynəlxalq neft-qaz şirkətindən 50 nəfər rəhbər şəxs və mütəxəssis nümayəndə təmsil olunur.