Rumıniyanın Ticarət və Sənaye Palatası ilə qarşılıqlı biznes missiyalarının təşkili müzakirə edilib

Bakı, 23 may, AZƏRTAC

Rumıniyanın Ticarət və Sənaye Palatası ilə görüşdə ölkələrimizin KOB subyektləri arasında əlaqələrin genişləndirilməsi üçün görülməli işlər müzakirə edilib.

Rumıniyaya səfər çərçivəsində Kiçik və Orta Biznesin İnkişafı Agentliyinin (KOBİA) İdarə Heyətinin sədri Orxan Məmmədov bu ölkənin Ticarət və Sənaye Palatasının prezidenti Mihai Daraban ilə görüşüb.

KOBİA-dan AZƏRTAC-a bildirilib ki, görüşdə iki ölkənin KOB subyektləri arasında əlaqələrin genişləndirilməsi potensialı, qarşılıqlı biznes missiyalarının təşkili və birgə əməkdaşlıq təşəbbüslərinə dair fikir mübadiləsi aparılıb.