Bakı, 1 iyun, AZƏRTAC

Rumıniyada aşkar edilən qaz yataqlarından azərbaycanlı həmkarlarımızla birlikdə təbii qaz hasil edəcəyik.

AZƏRTAC xəbər verir ki, bu sözləri Rumıniyanın energetika naziri Virgil Daniel Popesku deyib.

O bildirib ki, Azərbaycan Şərqi Avropanın enerji təhlükəsizliyinin təmin olunmasında mühüm rol oynayır. Təbii qazla yanaşı Azərbaycan Avropaya “yaşıl” enerji də ixrac etməyi planlaşdırır ki, bu da çox mütərəqqi haldır. Azərbaycanın iqlim potensialı alternativ enerji mənbələrinin inkişaf etdirilməsinə imkan yaradır və hökumət bundan düzgün istifadə edir.

Rumıniyanın energetika naziri qeyd edib ki, rəsmi Buxarest Azərbaycan ilə enerji sahəsində əməkdaşlıq edir və bu əməkdaşlıq davam edəcək.