Rus İcmasının və Rus Gəncləri Assosiasiyasının üzvləri ekofəallarla birgə şüarlar səsləndirirlər

Bakı, 1 fevral, Elmir Səftərov, AZƏRTAC

Azərbaycanın Qarabağ iqtisadi rayonunda faydalı qazıntı yataqlarının qanunsuz istismarının dayandırılmasını tələb edən aksiyaya dəstək üçün əraziyə gələn Azərbaycanın Rus İcmasının və Rus Gəncləri Assosiasiyasının üzvləri Laçın-Xankəndi yolunda ekofəalların dinc aksiyasına qoşulublar.

AZƏRTAC-ın müxbiri hadisə yerindən xəbər verir ki, onlar ekofəallar və gənc könüllülərlə birgə “Azərbaycan oyaqdır, sərvətinə dayaqdır!”, “Azərbaycan vahiddir, sərvətinə sahibdir!”, “Ekoloji cinayətə son!”, “Stop ekoterror!”, “Берегите природу!”, "Экоциду нет! Мониторингу да!" şüarlarını səsləndirirlər.

Qeyd edək ki, Azərbaycanın Rus İcmasının və Rus Gəncləri Assosiasiyasının üzvləri aksiya yerinə gəlmələrində əsas məqsəd ekofəallara dəstək nümayiş etdirməkdir.

Xatırladaq ki, ötən il dekabrın 3-də və 7-də Rusiya sülhməramlı kontingentinin komandanlığı ilə aparılmış müzakirələrin nəticəsi olaraq Azərbaycanın İqtisadiyyat, Ekologiya və Təbii Sərvətlər nazirlikləri, İqtisadiyyat Nazirliyi yanında Əmlak Məsələləri Dövlət Xidməti və “AzerGold” Qapalı Səhmdar Cəmiyyətinin mütəxəssislərindən ibarət heyət Rusiya sülhməramlı kontingentinin müvəqqəti yerləşdirildiyi Azərbaycan ərazilərində faydalı qazıntı yataqlarının qanunsuz istismarı, bundan irəli gələn ekoloji və digər fəsadlarla bağlı ilkin monitorinq aparmalı idi. Lakin sülhməramlıların hərəkətsizliyi ucbatından monitorinq baş tutmayıb. Buna etiraz olaraq, azərbaycanlı ekofəallar Şuşa ərazisindən keçən Laçın-Xankəndi yolunda dekabrın 12-dən dinc aksiyaya başlayıblar.