ELM VƏ TƏHSİL


Rusiya Gömrük Akademiyasına gömrük işi ixtisası üzrə tələbə qəbulu elan edilir

Bakı, 17 may, AZƏRTAC

Azərbaycan Respublikası Dövlət Gömrük Komitəsi ilə Rusiya Federal Gömrük Xidməti Rusiya Gömrük Akademiyası arasında əməkdaşlıq haqqında sazişə uyğun olaraq Moskva vilayəti Lüberts şəhərində yerləşən Rusiya Gömrük Akademiyasında gömrük işi ixtisası üzrə əyani təhsil alması üçün 2 nəfər Azərbaycan Respublikası vətəndaşı üçün yer ayrılıb.

Dövlət İmtahan Mərkəzindən AZƏRTAC-a bildiriblər ki, müsabiqədə yalnız cari ilin məzunları (rus bölməsi) iştirak edə bilərlər.

Abituriyentlər mayın 17-dən 25-dək aşağıda qeyd olunan sənədlərin fotosurətini [email protected] elektron poçt ünvanına göndərməklə qeydiyyatdan keçməlidirlər:

- şəxsiyyət vəsiqəsi;

- məktəbdən yarımillik qiymətlər göstərilən arayış;

- hərbi bilet və ya çаğırışçı şəhadətnaməsi (oğlanlar);

- əlaqə məlumatları.

Müsabiqədə iştirak etmək hüququna 2021-ci ildə orta məktəbin rus bölməsini bitirən, 2021-ci il iyunun 1-dək 19 yaşı tamam olmayan, buraxılış imtahanında 200 və daha yuxarı bal toplayan (mayın 25-dək bütün istiqamətlər üzrə nəticələr elan olunacaq), attestatında riyaziyyat, ümumi tarix və xarici dil fənləri üzrə yarımillik qiyməti 5 olan Azərbaycan Respublikasının vətəndaşları malikdirlər. Müsabiqədə iştirak etmək istəyənlər üçün Dövlət İmtahan Mərkəzi tərəfindən mayın sonlarında onlayn müsahibə keçiriləcək.

Ali təhsil müəssisəsinin tələbəsi və ya məzunu olan şəxslər bu müsabiqədə iştirak etmək hüququna malik deyillər.

Ərizə qəbulunda iştirak edən və onlayn müsahibədən uğurla keçən 4 nəfərin namizədliyi ödənişsiz təhsil forması üzrə oxumaq üçün qeyd olunan akademiyaya təqdim ediləcək.

Rusiya Gömrük Akademiyası tərəfindən abituriyentlər üçün ictimai fənlər, həmçinin rus dili və xarici dil fənləri üzrə distant formada imtahan keçiriləcək.

Abituriyentlər onları maraqlandıran əlavə məlumatları (+994 12) 404 22 00 (daxili 01-91) telefonu vasitəsilə, eləcə də DİM-in internet səhifəsində müvafiq keçidlərdən əldə edə bilərlər.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.