Bakı, 23 fevral, AZƏRTAC

“Pxençan-2018” Qış Olimpiya Oyunlarının on beşinci günündə - fevralın 23-də 5 dəst medalın sahibləri müəyyənləşib. Olimpiya bayrağı altında çıxış edən Rusiya idmançıları fiqurlu konkisürmə yarışlarında ilk qızıl medallarını qazanıblar.

AZƏRTAC xəbər verir ki, kişilər arasında kerlinq yarışlarında bürünc medal uğrunda İsveçrə və Kanada idmançıları üz-üzə gəliblər. Rəqibini 7:5 hesabı ilə məğlub edən İsveçrə atletləri Olimpiadanı üçüncü pillədə başa vurublar.

Fiqurlu konkisürən Alina Zaqitova Pxençanda qadınların yarışında qalib gələrək Rusiya komandasına Olimpiadanın ilk qızıl medalını qazandırıb. Rusiyanın digər təmsilçisi Yevgeniya Medvedeva gümüş mükafata sahib olub. Mayda 16 yaşı tamam olacaq A.Zaqitova qısa və sərbəst proqramlarda uğurlu çıxışına görə 239,57 xal toplayıb və Y.Medvedevanı (238,26) 1,31 bal geridə qoyub. Sərbəst proqramda çıxışına görə fiqurlu konkisürənlərə eyni qiymət (156,65) verilib. Kanadalı Keytli Osmond 231,02 balla üçüncü yeri tutub.

Qadınlar arasında fristayl idman növünün kross yarışlarında Kanada atletləri ilk iki pillədə yer alıblar. Kelsey Serva qızıl, Brittani Felan isə gümüş medal qazanıb. İlk üçlüyü isveçrəli Fanni Smit tamamlayıb.

Kişilər arasında 1000 metr məsafəyə konkisürmə yarışlarında Niderland idmançısı Kyeld Nuis 1 dəqiqə 7 saniyə göstərici ilə “Pxençan-2018”in qalibi olub. Norveç atleti Havard Lorentsen yarışı ikinci, Koreya Respublikasından olan Ti-Yun Kim isə üçüncü pillədə başa vurublar. Bu, H.Lorentsenin Olimpiadada ikinci medalıdır. O, 500 metr məsafəyə konkisürmə yarışlarında da Olimpiya çempionu olub.

Kişilər arasında biatlon üzrə 7,5 kilometr məsafəyə estafet yarışlarında İsveç komandası 1 saat 15 dəqiqə 16 saniyə ilə Olimpiya çempionu adını qazanıb. Norveç ikinci, Almaniya isə üçüncü yeri tutub.

Beləliklə, “Ağ Olimpiada”da on beşinci günün yekunlarına görə, Norveç millisi “Pxençan-2018” Qış Olimpiya Oyunlarının medal sıralamasında liderliyini davam etdirir. Bu ölkənin hesabında 13 qızıl, 14 gümüş və 10 bürünc medal var. Almaniya (13-7-6) ikinci, Kanada (10-8-9) üçüncü, ABŞ (8-7-6) dördüncü, Niderland (8-6-4) isə beşinci pillədə qərarlaşıb. Ümumilikdə 29 ölkənin idmançıları medalçılar arasında yer alıblar.