Rusiya və Ermənistan XİN başçıları Laçın yolu ətrafında vəziyyəti müzakirə edəcəklər

Moskva, 16 mart, AZƏRTAC

Rusiya və Ermənistan xarici işlər nazirləri Moskvada Laçın yolu ətrafında vəziyyəti müzakirə edəcəklər.

AZƏRTAC xəbər verir ki, bu barədə Rusiya XİN-in rəsmi nümayəndəsi Mariya Zaxarova brifinqdə bildirib.

O deyib ki, martın 20-də Ermənistan xarici işlər naziri Ararat Mirzoyan Moskvaya səfəri çərçivəsində Rusiya XİN başçısı Sergey Lavrovla görüşəcək.

Tərəflər MDB, Avrasiya İqtisadi Şurası və Kollektiv Təhlükəsizlik Müqaviləsi Təşkilatı çərçivəsində əməkdaşlıq, eləcə də regional problemləri, o cümlədən Laçın yolu ətrafında vəziyyət və Azərbaycan, Ermənistan və Rusiya liderlərinin imzaladıqları üçtərəfli razılaşmaların reallaşdırılması məsələlərini müzakirə edəcəklər.

Fəridə Abdullayeva

AZƏRTAC-ın xüsusi müxbiri

Moskva