Volqoqrad, 21 dekabr (AZƏRTAC). Dekabrın 20-də Rusiyanın Volqoqrad şəhərində Azərbaycan-Rusiya dostluğunun rəmzi olan yeni park açılmışdır.

“Volqoqrad-Bakı: Dostluq Parkı”nın açılış mərasimində Heydər Əliyev Fondunun vitse-prezidenti Leyla Əliyeva, Azərbaycan Prezidenti Administrasiyasının ictimai-siyasi məsələlər şöbəsinin müdiri Əli Həsənov, Volqoqrad vilayəti hökumətinin sədri Sergey Bajenov, Volqoqrad şəhərinin başçısı İrina Quseva və digər rəsmi şəxslər iştirak etmişlər.

Heydər Əliyev Fondunun vitse-prezidenti Leyla Əliyeva açılış mərasimində çıxış edərək səmimi qəbula görə təşəkkürünü bildirmişdir. Heydər Əliyev Fondunun Rusiya nümayəndəliyinin həyata keçirdiyi layihələrdən danışan Leyla Əliyeva vurğulamışdır ki, son bir neçə il ərzində Rusiyanın Ulyanovsk şəhərində məktəb binası tikilmiş, M.İ.Rudomino adına Ümumrusiya Dövlət Xarici Ədəbiyyat Kitabxanasında Azərbaycan Mədəniyyət Mərkəzi açılmış, Leninqrad vilayətindəki “Nevskiy pitoçok” Beynəlmiləl xatirə xiyabanında 1941-1944-cü illərdə Leninqrad uğrunda döyüşlərdə həlak olmuş azərbaycanlı əsgərlərin xatirəsinə abidə ucaldılmışdır.

Heydər Əliyev Fondunun vitse-prezidenti xatırlatmışdır ki, Azərbaycan nümayəndə heyəti Volqoqrada Həştərxandan gəlmişdir. Orada da Fondun dəstəyi ilə park, məktəb binası, uşaq meydançası tikilmiş, yeni uşaq bağçasının təməli qoyulmuşdur. Heydər Əliyev Fondu daha neçə belə maralı layihə həyata keçirəcəkdir.

Azərbaycanda böyük rus mədəniyyətinə, ədəbiyyatına və tarixinə hörmətlə yanaşıldığını qeyd edən Heydər Əliyev Fondunun vitse-prezidenti respublikamızın məktəblərində rus dilinin tədrisinin tam həcmdə saxlanıldığını, Rus Dram Teatrı, Rus Mədəniyyəti Mərkəzi, Bakı Slavyan Universiteti, M.V.Lomonosov adına Moskva Dövlət Universitetinin filialının fəaliyyət göstərdiyini demişdir. Leyla Əliyeva əmin olduğunu bildirmişdir ki, dostluq, etimad və qarşılıqlı anlaşmaya əsaslanan Azərbaycan-Rusiya münasibətləri bundan sonra da möhkəmlənəcək və inkişaf edəcəkdir.

Heydər Əliyev Fondunun vitse-prezidenti mərasim iştirakçılarını Bakıya dəvət etmişdir. O demişdir ki, Xəzərin sahili boyunca uzanan Bakı bulvarı, şəhərimizin görməli yerləri onlarda xoş təəssürat oyadacaqdır.

Volqoqrad vilayəti hökuməti sədrinin birinci müavini Roland Xerianov çıxışında bildirmişdir ki, Azərbaycan inşaatçıları qısa müddətdə gözəl park salmışlar. Volqoqradlılar buna görə Heydər Əliyev Fonduna minnətdardırlar. Bu parkın Rusiya ilə Azərbaycan arasında dostluq əlaqələrinin möhkəmlənməsinə xidmət edəcəyini vurğulayan R.Xerianov demişdir: “Əminəm ki, yeni park xalqlarımız arasında dostluğun rəmzinə çevriləcəkdir”. O, Volqoqradda Bakı küçəsinin olduğunu, Böyük Vətən müharibəsi illərində azərbaycanlı əsgərlərin Stalinqrad döyüşlərində qəhrəmancasına vuruşduqlarını da xatırlatmışdır.

Volqoqrad şəhərinin başçısı İrina Quseva qeyd etmişdir ki, vilayətin hökuməti Bakıda Stalinqrad döyüşü qəhrəmanlarının şərəfinə abidə ucaltmaq niyyətindədir.

Rusiya Prezidenti İdarəsinin regionlararası və mədəni əlaqələr departamentinin müşaviri Valeri Maksimov demişdir ki, Volqoqrad mərkəzi mədəniyyət və istirahət parkının ərazisi qısa müddətdə göz oxşayan mənzərəli, abad əraziyə çevrilmişdir. Burada şəhər sakinlərinin və qonaqların istirahəti üçün rahat infrastruktur yaradılmışdır.

Yeddi hektardan çox ərazidə salınmış parkda Azərbaycan xalqının ümummilli lideri Heydər Əliyevin barelyefi, uşaq meydançası, yaşıl zona, “Buta” və “Çay” fəvvarələri, “Qız Qalası” abidəsi, “Bakı” kafesi, Nobel qardaşlarının fotostendi vardır. XIX əsrin sonlarında bu parkın yerində Nobel şəhərciyi olmuşdur. Böyük Vətən müharibəsi illərində isə Bakıdan Volqa çayı ilə gətirilən neft buradakı anbarlarda saxlanılırdı. Həmin Bakı neftindən hazırlanan yanacaq döyüş təyyarələrini və tanklarını hərəkətə gətirirdi.

“Dostluq” parkı qəhrəman şəhərin sakinlərinin də ürəyincədir.

Volqoqradda yaşayan həmyerlimiz Leyla Zeynalova deyir: “Azərbaycan və Volqoqrad memarlarının birgə əməyinin bəhrəsi olan bu park şəhərin bəzəyidir. Belə bir parkın yaradılması biz azərbaycanlıları daha çox sevindirir”.

Şəhərin digər sakini Natalya Sevelobova demişdir ki, indi volqoqradlılar bu təmiz və abad parkda dincələcəklər. İnşaatçılar veteranları da unutmamışlar. Heydər Əliyevin barelyefi çox xoşuma gəlir. Volqoqrad beynəlmiləl şəhərdir. Əminəm ki, burada müxtəlif millətlərin nümayəndələri mənalı istirahət edəcəklər.

Xatırladaq ki, parkın təməli 2013-cü il iyunun 5-də Volqoqradda “Rusiya-Azərbaycan: regionlararası dialoq – 2013” IV Beynəlxalq Forumun ilk günündə keçirilən təntənəli mərasimdə qoyulmuşdur.

Parkın açılış mərasimindən sonra Heydər Əliyev Fondunun vitse-prezidenti Leyla Əliyevanın rəhbərliyi ilə nümayəndə heyəti Volqoqrad hökumətimin binasında qubernator Sergey Bajenov ilə görüşmüşdür.

Görüşdə Heydər Əliyev Fondunun vitse-prezidenti vurğulamışdır ki, Azərbaycan ilə Volqoqrad arasında əlaqələr inkişaf etdiriləcək, yeni layihələr reallaşdırılacaqdır. Leyla Əliyeva Rusiya Azərbaycanlı Gənclər Birliyinin bu regionda yeni bölməsinin açılacağını diqqətə çatdırmışdır.

Qubernator Sergey Bajenov ictimai və gənclər təşkilatları arasında təcrübə mübadiləsinin aparılmasının vacibliyini vurğulamış, gələn il Bakıya işgüzar səfər etmək niyyətində olduğunu söyləmişdir.

İkitərəfli görüşün nəticəsi olaraq Volqoqrad vilayəti ilə Azərbaycan arasında ticarət-iqtisadi, elmi-texniki, mədəni sahələrdə əməkdaşlıq haqqında saziş protokolu imzalanmışdır.

Qubernator Sergey Bajenov sənədlərin imzalanması mərasimindən sonra bildirmişdir ki, ikitərəfli dostluq və tərəfdaşlıq münasibətləri uzun illərin əməyinin bəhrəsidir və bu əlaqələr nəsillərdən nəsillərə ötürülür.

Səfər çərçivəsində Azərbaycan nümayəndə heyəti Heydər Əliyev Fondunun dəstəyi ilə Volqoqraddakı 3 nömrəli gimnaziyanın həyətində inşa olunmuş idman meydançasının açılış mərasimində iştirak etmişdir. Yeni müasir idman meydançasında şagirdlərin basketbol, voleybol və futbol oynaması üçün hər cür şərait yaradılmışdır.

Fəridə Abdullayeva

AZƏRTAC-ın xüsusi müxbiri

Volqoqrad