Tokio, 2 sentyabr, AZƏRTAC

Düşünürəm ki, komandamız düzgün yoldadır və daha böyük uğurlara layiqdir.

AZƏRTAC xəbər verir ki, bu sözləri agentliyin Yaponiyadakı xüsusi müxbirinə müsahibəsində cüdo üzrə Azərbaycan yığmasının baş məşqçisi Ruslan Maşurenko komandamızın Tokioda keçirilən dünya çempionatında çıxışını şərh edərkən deyib.

Yaponiyada keçirilən cüdo üzrə dünya çempionatında Azərbaycan yığmasının göstərdiyi nəticəni yüksək qiymətləndirən baş məşqçi bildirib: “Düşünürəm ki, idmançılarımız dünya çempionatında özlərini heç də pis göstərmədilər. Yarışların nəticəsi deməyə imkan verir ki, komandamız yaxşı formadadır. Qeyd etməliyəm ki, təəssüf doğuran səhvlərimiz də oldu. Məsələn, Zelim Kotsoyev (100 kiloqramadək) özü istəmədən qadağan edilmiş fənd işlətdi. Bunu hakimlərlə söhbət zamanı onlar da təsdiq etdilər. Buna baxmayaraq, onu görüşdən kənarlaşdırdılar”.

Digər idmançılarımızın uğurlu çıxışlarını xatırladan baş məşqçi deyib: “Uğurlu təsir bağışlayan idmançılar arasında Rüstəm Orucovu (73 kiloqramadək), Hidayət Heydərovu (73 kiloqramadək) və Nicat Şıxəlizadəni (66 kiloqramadək) qeyd etmək istərdim. Bu idmançılar həm yaxşı hazırlıqlı olmaları, həm də mübarizlikləri ilə diqqəti cəlb etdilər. Özünüz də gördünüz ki, bu idmançılar yalnız lisenziya üçün deyil, gələcəkdə Olimpiya medalları uğrunda mübarizə aparmağa hazır olduqlarını göstərdilər. Rüstəm Orucovun və Hidayət Heydərovun nəticələrini xüsusi qeyd etmək yerinə düşər. Bu idmançılar yaxşı formadadırlar və sonadək mübarizə aparmağa hazırdırlar. H.Heydərov üçüncü yer uğrunda 10 dəqiqədən çox mübarizə apardı və heç də zəif olmayan rəqibini məğlub etdi”.

Komandamızın üzvləri arasında yaxşı nəticə göstərə bilməyən idmançılarımız barəsində danışan baş məşqçi vurğulayıb: “Təəssüf ki, bəzi idmançılarımız gözlədiyimiz kimi çıxış edə bilmədilər. Məsələn, Uşanqi Kokauri çox həyəcanlandığına görə fərdi yarışlarda özünü göstərə bilmədi. Amma komanda yarışında kifayət qədər güclü olan braziliyalı Olimpiya və dünya çempionatının mükafatçısını məğlub etdi. Buna görə də düşünürəm ki, komanda düzgün yoldadır və gələcəkdə nəticələrimizi daha da yüksəltməyə çalışacağıq”.

Komandanın son dünya çempionatında qazandığı nəticələri ötən il Bakıda keçirilən mundialla müqayisə edən R.Maşurenko bu dəfə uğurların daha çox olduğunu bildirib: “Əgər ötən il keçirilən dünya çempionatı ilə müqayisə etsək, uğurlarımızın daha çox olduğu aydın görünər. Fərdi yarışlarda Azərbaycan komandası on birinci, kişilər arasında isə yeddinci yeri tutub. Budəfəki çempionatda rekord sayda - 148 ölkənin çıxış etməsinə baxmayaraq, komanda yarışlarında beşinci yeri tutduq. Bu yer uğrunda mübarizədə biz çox güclü komandaları məğlub etdik. Məsələn, bu ilin Avropa çempionatında mükafat almış Portuqaliya yığmasını, Asiyanın ən güclü yığmalarından biri olan Koreya Respublikasının komandasını məğlub etdik. Düşünürəm ki, biz layiq olduğumuz yeri qazana bildik. Dünya çempionatı bir daha göstərdi ki, cüdo üzrə Azərbaycan yığması yaxşı səviyyədədir. Lakin bununla kifayətlənməyərək komandanın səviyyəsini daha yüksəyə qaldırmağa, gələn il keçiriləcək Yay Olimpiya Oyunlarına yaxşı hazırlaşaraq, daha böyük uğurlar qazanmağa çalışacağıq”.

Vüqar Ağayev

AZƏRTAC-ın xüsusi müxbiri

Tokio