Rüstəm Rəcəbov: Layihə altına düşən ağac və kollara ekvivalent olaraq yaşıllıqlar salınacaq

Bakı, 26 may, AZƏRTAC

Layihə sahəsində bilavasitə tikinti altında qalan ağac və kollara ekvivalent yaşıllıqlar Ekologiya və Təbi Sərvətlər Nazirliyi ilə razılaşdırılmış yerdə salınması nəzərdə tutulub.

AZƏRTAC xəbər verir ki, bunu Dövlət Ekoloji Ekspertiza Agentliyində Oxçuçay üzərində “Azərenerji” ASC tərəfindən inşası həyata keçirilən “Şayıflı”, “Sarıqışlaq”, “Zəngilan” və “Cahangirbəyli” kiçik su elektrik stansiyalarının (KSES) binasının, suqəbuledicisinin və basqılı su borusunun tikintisi məqsədilə “Ətraf mühitə təsirin qiymətləndirilməsi” hesabatına dair keçirilən ictimai dinləmədə "Azərenerji" ASC, Enerji İstehsalı Operatorunun Hidrotexniki Xidmətinin rəisi Rüstəm Rəcəbov deyib. O bildirib ki, çay ekosisteminin qorunması üçün ekoloji axımın saxlanılması, hidromorfoloji dəyişikliklərin olmaması üçün çay məcrasında düzləndirmə və planlaşdırma işlərinin aparılmaması nəzərdə tutulub: "İnfrastruktur sahələri ərazisindən götürülən torpağın üst münbit qatının toplanması və təyinatına uyğun istifadəsi, seçilmiş hidroaqreqatlar suyun keyfiyyətinə təsir etməməsi və istiqamətləndirici aparatın quruluşunun yağ və digər zərərli maddələrin suya qarışmasının qarşısını alması, temperatur və digər keyfiyyət göstəricilərində heç bir dəyişiklik olmadan suyun aşağı axarda yenidən çaya qaytarılması planlaşdırılır".