AZƏRTAC xəbər verir ki, Bağdadda keçmiş İraq prezidenti Səddam Hüseyni mühakimə edəcək tribunalın tərkibi açıqlanmışdır. İraq Milli Konqresinin (İMK) rəsmi nümayəndəsinin dediyinə görə, məhkəmə prosesinə Müvəqqəti İdarə Şurasının üzvü və İMK-nın lideri Əhməd Çələbinin qardaşı oğlu Sami Çələbi başçılıq edəcəkdir.

Sabiq prezidentin öz xalqına və qonşu ölkələrin xalqlarına qarşı cinayətlərinin təhqiqini yeddi hakim və beş ittihamçı aparacaqdır. İraq paytaxtında Səddam Hüseynin məhkəməsi üçün bina artıq ayrılmışdır. Lakin məhkəmənin nə vaxt başlanacağı bildirilməmişdir.

Səddam Hüseyni bir qrup ərəb və əcnəbi hüquqşünasla birlikdə tanınmış iordaniyalı vəkil Məhəmməd Raşdan müdafiə edəcəkdir.