İcazə verin, Sizi Şəki ictimaiyyəti adından ürəkdən salamlayım, qədim və gözəl Şəkimizə “Xoş gəlmisiniz!” deyim.

Cənab Prezident!

Sizin Şəkiyə hər gəlişiniz rayonda əsil bayrama çevrilir, xoş əhval-ruhiyyə, yeni ab-hava yaradır. Budəfəki səfəriniz daha bir əlamətdar hadisə - Prezident seçilməyinizin üçüncü ildönümü ilə bir vaxta düşür. Bizim üçün çox böyük şərəfdir ki, siz bu günü şəkililərlə birlikdə qeyd edirsiniz.

Sizin regionlara səfərləriniz həmişə yeni obyektlərin təməlqoyma və açılış mərasimləri ilə yadda qalır və xalqımızı sevindirir. Sizin xeyir-duanızla bir il öncə inşasına başlanmış Şəki modul elektrik stansiyasının açılış mərasiminə toplaşmışıq. Bu stansiya nəinki Şəkinin, eləcə də bölgəmizin elektrik enerjisi ilə sabit təchizatına imkan verəcək, bölgəmizə sərmayə qoymaq niyyətində olan sahibkarlara və iş adamlarına təminat yaradacaqdır. Bölgəmizə nur gətirən bu stansiyanın açılışına görə Sizə camaatımız adından minnətdarlığımı bildirirəm.

Cənab Prezident!

Ulu öndərimiz Heydər Əliyevin vətənimizin, eləcə də rayonumuzun tərəqqisi naminə həyata keçirdiyi möhtəşəm işlər xalqımızın yaddaşında silinməz izlər buraxmışdır və o, qəlbimizdə daim yaşayır. Ümummilli liderimizin gördüyü işlərin Sizin tərəfinizdən uğurla davam etdirilməsi, onun ideyalarının, cəmiyyətə təqdim etdiyi siyasi xəttin yaradıcılıqla, qətiyyətlə həyata keçirilməsi müstəqil Azərbaycanımızın günü-gündən qüdrətlənməsini, əhalinin həyat səviyyəsinin yaxşılaşmasını təmin etməklə vətəndaşlarımızda dövlətçiliyimizə inamı, Sizə sevgini möhkəmləndirir. Xüsusilə regionların sosial-iqtisadi inkişafı Dövlət proqramının qəbul edilməsi, respublikamızın şəhər və rayonlarını yeni inkişaf mərhələsinə çıxarmışdır.

İcazə verin, iftixarla qeyd etdiyimiz, dövlət başçısı seçildiyiniz gündən keçən üç ildə Şəkidə görülən işlər haqqında danışım. Bu dövrdə Şəki xanlarının sarayı bərpa olunmuş, Əlillərin Bərpa Mərkəzi, Heydər Əliyev adına Kiş kənd 1 nömrəli orta məktəbin, Vərəzət kənd orta məktəbinin, “Yeniləşən Azərbaycana yeni məktəb” layihəsi çərçivəsində Heydər Əliyev Fondunun prezidenti Mehriban xanım Əliyevanın təşəbbüsü ilə Oraban, İnçə, Qozlubulaq kənd məktəblərinin binaları, şəhərdəki 10 nömrəli orta məktəb üçün 240 yerlik yeni korpus, kərpic, konserv və meyvə şirələri zavodları, İdman Sağlamlıq Mərkəzi, Şin çayı üzərindən keçən körpü, Dövlət Sərhəd Xidmətinin Şəki sərhəd dəstəsi və Şəki Mülkü müdafiə regional mərkəzi üçün inzibati və yardımıçı binalar, Qarabağ müharibəsi əlilləri və şəhid ailələri üçün 8 və 24 mənzilli yaşayış evləri tikilərək istifadəyə verilmişdir.

Şəkinin perspektiv imkanlarına və potensialına uyğun olaraq turizm infrastrukturu genişlənir. Yeni mehmanxanalar, turizm-istirahət mərkəzləri yaradılır. Yollar, küçələr, meydanlar abadlaşır. İnsanların təbii qaz, elektrik enerjisi ilə təminatı günbəgün yaxşılaşır. Sizin rəhbərliyinizlə ölkəmizdə yaradılmış əlverişli şərait sahibkarları, iş adamlarını müxtəlif sahələrə sərmayə qoymağa həvəsləndirir. Artıq onlar müasir tələblərə cavab verən məktəb binası, istehsal sahələri, ticarət və iaşə obyektləri inşa edirlər. Görülən tədbirlər nəticəsində rayonumuzda yeni açılmış və fəaliyyəti bərpa olunmuş müəssisələrdə, eləcə də digər tədbirlər üzrə 12 min 750 yeni iş yeri açılmışdır.

Cənab Prezident!

Sizin bu ilin aprel ayında ölkə başçısı kimi şəhərimizə ilk səfəriniz, ictimaiyyətlə keçirdiyiniz görüşlər, söylədiyiniz nitqlər insanlarımızın hafizəsində dərin iz buraxmışdır. Şəkidə olarkən gördüyümüz işləri dəyərləndirməyiniz bizi daha da ruhlandırmış, daha səylə çalışmağa sövq etmişdir.

Bölgəmizə səfərinizdən sonra Şəki ilə bağlı 19 müddəanı əhatə edən, demək olar ki, rayonumuzun problemlərinin həllinə yönələn sərəncamınız hamımızın sevincinə səbəb olmuş və bunu Sizin Şəkiyə və şəkililərə olan böyük sevginizin, həssas münasibətinizin, yüksək qayğınızın növbəti təzahürü kimi qəbul edirik.

Bir daha hamılıqla Sizə dərin minnətdarlığımızı bildirir və Sizi əmin edirik ki, qəbul etdiyiniz dövlət proqramlarından irəli gələn vəzifələri hamılıqla layiqincə yerinə yetirəcəyik.

Cənab Prezident!

Şəki camaatı Sizi sevir, Sizə inanır və Sizinlə fəxr edir.

Sizə cansağlığı və Azərbaycanımızın daha qüdrətlənməsi, xalqımızın firavanlığı naminə həyata keçirdiyiniz böyük işlərdə uğurlar diləyirik.

Diqqətinizə görə sağ olun.