AZƏRTAC Röyter agentliyinə istinadla xəbər verir ki, Türkmənistan Prezidenti Saparmurad Niyazov türkmənlərə qızıl diş qoydurmamağı tövsiyə etmişdir.

Türkmənistan Prezidenti ali məktəblərdən birində onunla görüşdə təbrik nitqi ilə çıxış edən tələbə qızın sözünü kəsərək demişdir: “Sən qızıl dişlərinlə gözəl görünürsən, amma ağ dişlərin olsaydı, daha gözəl olardın. Yeri gəlmişkən, səhiyyə naziri salonda əyləşmişdir. O, ixtisasca stomatoloqdur, sənə ağ dişlər düzəldər”. Niyazov vurğulamışdır ki, qızıl dişlər keçmişin qalığıdır.

Prezidentin univesitet tələbələri ilə görüşü dövlət televiziyası ilə birbaşa yayımlanmışdır. Güman edilir ki, bu çıxışdan sonra qızıl diş qoyduranların sayı xeyli azalacaqdır.

Bundan əvvəl Niyazov saqqallı və uzun saçlı tələbələrdən xoşu gəlmədiyini söyləmişdi. Çox keçmədi ki, ölkənin bütün ali məktəb tələbələri özlərini Prezidentin zövqünə uyğun görkəmə saldılar.