CƏMİYYƏT
“SMM2018 Business Breakfast” layihəsi başa çatıb
Bakı, 13 oktyabr, AZƏRTAC
Oktyabrın 13-də “SMM2018 Business Breakfast” layihəsinin bağlanışı olub.
AZƏRTAC xəbər verir ki, bununla bağlı keçirilən tədbirdə çıxış edən layihə rəhbəri Ləman Əhmədova artıq üçüncü dəfədir reallaşdırılan layihənin əsas məqsədinin sosial media marketinq sahəsi üzrə kadrların hazırlanması olduğunu deyib. Bildirib ki, “SMM2018 Business Breakfast” layihəsi ASAN Könüllülük Məktəbinin “ASAN kadr” karyera mərkəzinin təşkilatçılığı, Azərbaycan Beynəlxalq Bankının baş sponsorluğu, “Alliance Medical Assistance”, “Media Balans”, “Winter Park Hotel Baku”nun birgə tərəfdaşlığı ilə həyata keçirilib.
Azərbaycan Beynəlxalq Bankı ASC-nin marketinq kommunikasiyaları şöbəsinin rəhbəri Kamal Eminov sosial marketinq sahəsinin əhəmiyyətini vurğulayıb. O deyib ki, “SMM2018 Business Breakfast” layihəsi sayəsində gənclər qarşılarına çıxan çağırışların öhdəsindən gələ biləcəklər. Sosial media artıq insanlar üçün vaxt keçirmək yox, daha operativ informasiya əldə etmək, iş münasibətləri qurmaq üçün önəmlidir.
Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin insan resursları və təlim şöbəsinin müdir müavini Cahangir Hacıyev deyib ki, “SMM Business Breakfast” layihəsinin əhəmiyyəti getdikcə artır. Layihədə iştirak edənlər sonradan özlərinə şirkətlər yaradırlar, sosial media marketinq sahəsində püxtələşirlər. İştirakçılar aldıqları ixtisasdan asılı olmayaraq özləri üçün yeni yol, peşə müəyyənləşdirirlər.
“SMM Business Breakfast” layihəsinin üç il ərzində 200-ə yaxın iştirakçısı olub.
Sonra layihə iştirakçıları təqdimatlarla çıxış ediblər.
Bağlanış mərasimində iştirakçılara sertifikatlar təqdim olunub və qalib komandaya pul mükafatı verilib.
Qeyd edək ki, layihə çərçivəsində iştirakçılar üçün 2 aylıq ödənişsiz SMM təlimləri keçirilib, bu sahənin tanınmış mütəxəssisləri ilə görüşlər, təlimlər təşkil olunub. Həmçinin işgüzar çevrəyə daxilolma, kommunikasiya imkanlarının genişləndirilməsi üçün şirkət rəhbərləri ilə səhər yeməyində birgə iştirak təmin olunub.
Layihənin əsas məqsədi sosial media sahəsində mütəxəssislər formalaşdırmaq, iştirakçılara nəzəri və təcrübi tövsiyələr verməkdir.