Bakı, 26 yanvar, AZƏRTAC

“SOCAR Methanol” MMC keçən il 43 milyon ABŞ dolları həcmində məhsul ixracı həyata keçirib.

AZƏRTAC xəbər verir ki, bu barədə İqtisadi İslahatların Təhlili və Kommunikasiya Mərkəzinin (İİTKM) “İxrac İcmalı”nın ötən ilin yekunlarını əks etdirən 2018-ci ilin yanvar buraxılışında bildirilir.

2017-ci ildə istehsal etdiyi məhsulun 95 faizi ixraca yönəldən “SOCAR Methanol” MMC-nin milli iqtisadiyyatın artımına göstərdiyi töhfəsi artıq statistik hesabatlarda öz əksini tapmaqdadır. Hesabata əsasən, “SOCAR Methanol” ötən il ərzində 43 milyon ABŞ dolları həcmində məhsul ixrac edərək qeyri-neft sektoru üzrə ixrac əməliyyatlarında iştirak edən dövlətə məxsus ixracatçı şirkətlərin reytinqində beşinci yerdə, ümumi qeyri-neft mallarının ixracı siyahısında isə yeddinci yerdə qərarlaşıb.

İcmalda 2017-ci il ərzində Azərbaycanda qeyri-neft sektoru üzrə ixracın 1 milyard 538 milyon ABŞ dolları təşkil etdiyi göstərilir. Beləliklə, ölkənin 2017-ci il ərzində qeyri-neft ixracının təqribən 3 faizi “SOCAR Methanol”un payına düşür.