İQTİSADİYYAT


“SOCAR Türkiyə” 1,3 milyard dollarlıq maliyyələşmə cəlb edib

“SOCAR Türkiyə” 1,3 milyard dollarlıq maliyyələşmə cəlb edib

Bakı, 17 avqust, AZƏRTAC

“SOCAR Türkiyə” əvvəlki öhdəliklərini təkrar maliyyələşdirmək məqsədilə “JP Morgan” və “Citi” başda olmaqla kredit institutlarından 1,3 milyard ABŞ dolları ekvivalenti məbləğində maliyyələşmə təmin edib.

Şirkətdən AZƏRTAC-a bildirilib ki, təkrar maliyyələşmə əməliyyatı şirkətin maliyyə öhdəliklərini artırmır və əvvəlki səviyyədə sabit saxlayır. “SOCAR Türkiyə” qlobal qeyri-müəyyənliklə müşahidə olunan pandemiya dövründə təmin etdiyi yüksək məbləğli təkrar maliyyələşmə ilə dünya bazarlarında güclü mövqeyini bir daha sübut edib.

Azərbaycan Respublikası Dövlət Neft Şirkəti SOCAR-ın törəmə müəssisəsi olan “SOCAR Türkiyə” 2021-ci ildə dünyanın nüfuzlu banklarından olan “JP Morgan Securities plc” (“JP Morgan”) və “Citibank N.A.”nın London filialı (Citi) başda olmaqla kredit institutlarından əlverişli şərtlərlə 1,3 milyard ABŞ dolları ekvivalenti məbləğində maliyyə vəsaiti cəlb etməklə təkrar maliyyələşmə əməliyyatını reallaşdırıb.

Pandemiyanın qlobal iqtisadiyyatda yaratdığı gərginliyin davam etdiyi bir şəraitdə təkrar maliyyələşdirmə məqsədilə cəlb olunan vəsait ödəmə müddətinin uzunluğu, bazardakı oxşarları və əvvəlki maliyyə öhdəlikləri ilə müqayisədə faizin aşağı olmasına görə diqqət çəkir. Dünyanın qabaqcıl bank və maliyyə təşkilatlarının iştirakı əsasında yaradılan sindikat tərəfindən SOCAR-ın təminatı ilə 5 il müddətinə və illik LIBOR/EURIBOR +3.45 faizlə cəlb edilən vəsait qlobal maliyyə dairələrində SOCAR-ın və “SOCAR Türkiyə”nin sağlam maliyyə strukturuna və güclü mövqeyinə etimadın təzahürü kimi dəyərləndirilir. Təkrar maliyyələşdirmə əməliyyatı nəticəsində kənardan cəlb edilən vəsait şirkətin əvvəlki öhdəliklərinin bir hissəsini əvəzlədiyinə görə SOCAR üçün əlavə öhdəlik həcmi yaratmayıb.

SOCAR-a və Türkiyəyə olan böyük etimadın təzahürü

“SOCAR Türkiyə” İdarə Heyətinin sədri Rövnəq Abdullayev deyib: “JP Morgan” və “Citi” başda olmaqla dünyanın nüfuzlu maliyyə qurumları tərəfindən bu miqyasda və əlverişli şərtlərlə təkrar maliyyələşmə vəsaitinin ayrılması pandemiya səbəbindən bazarlarda davam edən qlobal qeyri-müəyyənlik şəraitində “SOCAR Türkiyə”yə olan böyük etimadın təzahürüdür. Beynəlxalq maliyyə mənbələrindən əhəmiyyətli həcmdə maliyyə vəsaitlərinin cəlb edilməsi SOCAR Qrupun likvidlik göstəricilərinin yaxşılaşdırılmasına səbəb olur, eyni zamanda, layihələrimizin maliyyə institutları tərəfindən dəstəkləndiyinin ifadəsidir”.

Bu əməliyyatda “SOCAR Türkiyə”nin hüqüqlarını “Ünsal Avukatlık Ortaklığı”, “Vinson & Elkins RLLP” və “Omni Law Firm” qoruyub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.