İQTİSADİYYAT


SOCAR fermer təsərrüfatlarının dəstəklənməsi üçün yeni layihə həyata keçirir

Bakı, 3 avqust, AZƏRTAC

SOCAR Cənubi Qafqaz Boru Kəməri (CQBK) üzrə tərəfdaşları ilə birlikdə daha bir sosial layihəyə start verib.

SOCAR-dan AZƏRTAC-a bildirilib ki, “ProFarms” adlanan layihə regionların sosial-iqtisadi inkişafı üzrə Dövlət Proqramına uyğun olaraq boru kəməri boyunca yaşayan kənd sakinlərinin sosial-iqtisadi vəziyyətinin yaxşılaşdırılması və kiçik sahibkarlıq ekosisteminin inkişafının təmin edilməsi məqsədi daşıyır. Layihə çərçivəsində şəhid ailələrinə, Vətən müharibəsi veteranlarına, yerli aztəminatlı ailələrə, təqaüdçü və ehtiyatda olan hərbçilərə müxtəlif növlü yardımların göstərilməsi nəzərdə tutulur. 2023-cü ilin fevral ayına kimi davam edəcək layihə Kürdəmir, Ağdaş, Ucar və Yevlax rayonlarında yerləşən 20 kəndi və 200 fərdi fermer təsərrüfatını əhatə edəcək. “ProFarms” layihəsi çərçivəsində dəstəklənəcək kəndli fermerlərin 50 faizini qadınlar təşkil edir.

Layihənin hədəflərinə nail olmaq üçün bir sıra xidmətlər göstəriləcək. Bu xidmətlərə arıçılıq və istixana təsərrüfatları üzrə peşə təlimlərinin təşkili, 100 ailə üçün hər birinin sahəsi 100 kvadratmetr olan istixanaların quraşdırılması, 100 ailənin hər birinə 10 arı ailəsi və arı pətəklərinin, müvafiq arıçılıq alətləri dəstinin paylanması, layihəyə seçilmiş şəxslərin bizneslərini uğurlu planlaması və idarə etməsinə dəstək olmaq üçün maliyyə savadlılığı və biznesin idarə edilməsi mövzularında təlimlərin təşkili, seçilmiş bölgələrdə bal istehsalının artmasına dəstək olmaq üçün 30 min bol nektar istehsal edən meyvə ağaclarının və giləmeyvə kollarının əkilməsi, arıçılıq, istixana əkini, biznes planlaması və idarəetməsi ilə əlaqədar müddətli məsləhət və mentorluq xidmətinin təşkili, layihə haqqında informasiya kampaniyasının və layihədən faydalanacaq şəxslərin seçim prosesinin təşkili aiddir.

Qeyd edək ki, 2003-cü ildən etibarən Cənubi Qafqaz Boru Kəməri (CQBK) Şirkətində iştirak payına malik olan tərəfdaş şirkətlərin maliyyə dəstəyi ilə kənd təsərrüfatının inkişafına yönəlmiş bir sıra layihələr həyata keçirilmişdir.

CQBK layihəsində iştirakçıların pay bölgüsü hazırda belədir: SOCAR (10 faiz), Cənub Qaz Dəhlizi şirkəti (6,67 faiz), BP (28,83 faiz), TPAO (19 faiz), Petronas (15,5 faiz), Lukoil (10 faiz), NİCO (10 faiz).

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.